The news is by your side.

Advertisement

شاہ لطیف ٹاؤن سے گرفتارغیرملکی دہشت گردوں سے تحقیقات کیلئے جےآئی ٹی تشکیل

کراچی : محکمہ داخلہ سندھ نے شاہ لطیف ٹاؤن سے گرفتارغیرملکی دہشت گردوں سے تحقیقات کیلئے جےآئی ٹی بنادی اور 30 دن کے اندر رپورٹ جمع کرانے کی ہدایت کردی۔

تفصیلات کے مطابق شاہ لطیف ٹاؤن سے گرفتارغیرملکی دہشت گردوں کے معاملے کی مکمل تحقیقات کیلئے محکمہ داخلہ سندھ نے جے آئی ٹی بنادی اور اس حوالے سے اعلامیہ جاری کردیا۔

اعلامیے میں کہا گیا ہے کہ آئی جی سندھ کی درخواست پر جے آئی ٹی بنائی گئی ہے، جےآئی ٹی ایس ایس پی سی ٹی ڈی عارف عزیزکی سربراہی میں قائم کی گئی ، جس میں آئی ایس آئی،آئی بی،رینجرز،اسپیشل برانچ اور پولیس کے افسران شامل ہیں۔

جاری اعلامیے میں کہا ہے کہ جےآئی ٹی اپنی معاونت کیلئے کسی بھی ایجنسی سے مدد لےسکتی ہے، مکمل تحقیقات کے بعد 30دن کے اندر رپورٹ جمع کرانے کی ہدایت کی گئی ہے۔

ذرائع کا کہنا ہے کہ ابتدائی تحقیقات میں دہشتگردوں نےاہم انکشافات کئےہیں، جے آئی ٹی ان انکشافات کا جائزہ لینے سمیت ٹھوس تفتیش کرے گی، وفاقی حکومت کی جانب سےاس معاملے پر جلد پریس کانفرنس کا امکان ہے۔

یاد رہے ڈی آئی جی سی ٹی ڈی نے شاہ لطیف ٹاؤن سے گرفتار دہشت گردوں سے تفتیش کے لیے جے آئی ٹی تشکیل دینے کی سفارش کی تھی۔

واضح رہے انسداد دہشت گردی فورس اور حساس اداروں کی جانب سے دہشت گردوں کی موجودگی کی اطلاع پر شاہ لطیف ٹاؤن میں موجود مکان پر چھاپا مارا گیا تھا، جس پر دہشت گردوں نے سیکیورٹی اہل کاروں پر حملہ فائرنگ کی گئی۔

فائرنگ کے تبادلے میں ایک دہشت گرد ہلاک جبکہ پانچ دہشتگردوں کو گرفتار کرکے بھاری مقدار میں بارودی مواد برآمد کرلیا تھا۔

بعد ازاں گرفتار دہشت گردوں نے تفتیش میں تہلکہ خیز انکشافات کرتے ہوئے بتایا تھا کہ ہمارا ہدف سندھ اسمبلی تھی ، سندھ اسمبلی کےبعد کچھ اہم مقامات کو ٹارگٹ کرنا تھا۔

Comments

یہ بھی پڑھیں