کوئنز لینڈ : آسٹریلیا کی ریاست کوئنز لینڈ کی حکومت نے دنیا بھر سے افرادی قوت کے حصول کیلئے اہم اقدامات کیے ہیں جس کے لیے بڑی سرمایہ کاری کا فیصلہ کیا گیا ہے۔
اس حوالے سے ذرائع کا کہنا ہے کہ کوئنز لینڈ میں ملازمتوں کے مواقع پیدا کیے جارہے ہیں جن میں تارکین وطن جن میں معذور افراد اورخواتین کو بھی ملازمتیں فراہم کی جائیں گی۔
غیر ملکی خبر رساں ادارے کی رپورٹ کے مطابق کوئنز لینڈ ایسے کاروباری اداروں کی بھی حوصلہ افزائی کرے گا کہ جو زیادہ سے زیادہ خواتین، معذور افراد اور تارکین وطن کو ملازمت کی پیشکش کرکے کارکنوں کی کمی کو پورا کریں گے۔
اس کے علاوہ کوئنز لینڈ شمالی علاقہ جات میں مہاجرین کی تعداد میں اضافہ کرنا چاہتا ہے اور کارکنوں کے لیے سستی رہائش کے لیے فنڈز بھی فراہم کرنا چاہتا ہے۔
کوئینز لینڈ کی حکومت خالی ملازمتوں کو پر کرنے کے اپنے منصوبے کے حصے کے طور پر مزید خواتین اور معذور افراد کو ملازمت دینے کے لیے کاروباری اداروں کی حوصلہ افزائی کے لیے 20 ملین ڈالر خرچ کرے گی۔
منگل کو جاری ہونے والی ایک رپورٹ کے مطابق ریاستی حکومت کی 10 سالہ افرادی قوت کی حکمت عملی کے منصوبے کے تحت تارکین وطن، پناہ گزینوں اور غیر ملکی طلباء کو روزگار تلاش کرنے میں مدد کے لیے مزید 14 ملین ڈالر کی سرمایہ کاری کی جائے گی۔
سرکاری اعداد و شمار کے مطابق کوئینز لینڈ میں ملازمتوں کی تعداد 2020 اور 2025 کے درمیان تقریباً دو لاکھ 80ہزار تک بڑھے گی لیکن ریٹائرمنٹ کی عمر تک پہنچنے والے افراد کی تعداد میں تقریباً ایک تہائی اضافہ ہوگا۔
