واشنگٹن: نومنتخب امریکی صدر جوبائیڈن نے کرونا وائرس سے بچاؤ کی ویکسین پر عوام کے اعتماد کے سلسلے میں اہم اعلان کرتے ہوئے کہا ہے کہ عوام کا اعتماد حاصل کرنے کے لیے وہ ان کے سامنے ویکسین لگوائیں گے۔
تفصیلات کے مطابق نومنتخب امریکی صدر جو بائیڈن نے امریکی ٹی وی کو انٹرویو دیتے ہوئے کہا ہم نے معیشت بند کیے بغیر کرونا سے مقابلے کی حکمت عملی تیار کی ہے، ڈاکٹر فاؤچی میری انتظامیہ میں کرونا رسپانس ٹیم کا حصہ ہوں گے۔
جوبائیڈن نے کہا کرونا ویکسین پر امریکی عوام کا اعتماد نہیں، ہمیں یقینی بنانا ہے کہ امریکی کرونا ویکسین پر اعتماد کریں، اعتماد حاصل کرنے کے لیے عوام کے سامنے ویکسین لگواؤں گا۔
انھوں نے کہا صدارت سنبھالنے کے بعد 100 روز تک ماسک پہننے کا کہوں گا، امریکی صرف 100 دن کے لیے ماسک پہنیں، ہمیشہ کے لیے نہیں، سو دن ماسک پہنا تو کرونا کیسز میں نمایاں کمی دیکھ سکتے ہیں، جہاں میرا اختیار ہوا ماسک پہننے کا حکم نامہ جاری کروں گا۔
امریکا میں کرونا کی دوسری لہر نے تباہی مچا دی، ایک دن میں ریکارڈ اموات
جوبائیڈن نے مزید کہا کہ ڈاکٹر انتھونی فاؤچی سے چیف میڈیکل ایڈوائزر کا عہدہ سنبھالنے کا کہا ہے، ڈاکٹر فاؤچی میری انتظامیہ میں کرونا رسپانس ٹیم کا حصہ ہوں گے۔
واضح رہے کہ امریکا میں کرونا وبا کی دوسری لہر نے بڑی تباہی مچا دی ہے، ایک دن میں وائرس سے ریکارڈ 2915 اموات واقع ہوئیں، مہلک وائرس کو وِڈ 19 سے اموات کی مجموعی تعداد 2 لاکھ 82 ہزار 829 ہو گئی ہے۔ گزشتہ چوبیس گھنٹوں کے دوران نئے کیسز کی تعداد بھی 2 لاکھ 82 ہزار سے زائد ہے، جس کے بعد مجموعی کیسز کی تعداد بڑھ کر 1 کروڑ 45 لاکھ 35 ہزار سے زائد ہو گئی ہے۔
