واشنگٹن: جو بائیڈن نے روس کا مقابلہ کرنے کے لیے یوکرین سے ایک اور بڑا وعدہ کر لیا، امریکا نے کیف کے لیے درجنوں نئے فضائی دفاعی نظام کا اعلان کیا ہے۔
تفصیلات کے مطابق واشنگٹن ڈی سی میں نیٹو اجلاس میں روس کے حملوں کا مقابلہ کرنے کے لیے امریکی صدر جو بائیڈن نے یوکرین کو 5 نئے اسٹریٹجک فضائی دفاعی نظام فراہم کرنے کا وعدہ کر لیا ہے۔
صدر جو بائیڈن نے نیٹو اتحاد کو پہلے سے زیادہ طاقت ورقرار دیا اور کہا کہ امریکا جرمنی، اٹلی، ہالینڈ اور رومانیہ کے ساتھ مل کر یوکرین کی مدد کے لیے پیٹریاٹ میزائل، بیٹریاں اور دیگر نظام فراہم کرے گا۔
ٹیلی پرامپٹر کے ذریعے خطاب کرتے ہوئے جو بائیڈن نے کہا کہ آٹوکریٹ عالمی نظام کو الٹنا چاہتے ہیں، اور دہشت گرد گروہ شرارتی منصوبوں کی سازشیں جاری رکھے ہوئے ہیں، دوسری طرف یورپ میں روسی صدر ولادیمیر پیوٹن یوکرین کو نقشے سے مٹانا چاہتے ہیں، لیکن واضح رہے کہ ہماری مکمل حمایت سے یوکرین روس کو روک سکتا ہے۔
’نیٹو نے یوکرین کو ایف 16 طیاروں کی منتقلی شروع کر دی‘
نیٹو کے چیف اسٹولٹن برگ نے بھی اجلاس میں کہا چین روس کو یوکرین پر حملہ کرنے کے لیے ہتھیار بنانے میں مدد کر رہا ہے۔
ترجمان چینی دفتر خارجہ نے رد عمل میں کہا کہ نیٹو سربراہی اجلاس کا اعلامیہ جنگی بیانات سے بھرا ہوا ہے، چین سے متعلق مواد اشتعال انگیزی پر مبنی اور جھوٹ ہے، یوکرین کے خلاف روس کی مدد نہیں کر رہے۔
