نیویارک: نیشنل سیکیورٹی کونسل کے ترجمان جان کربی کا کہنا ہے کہ پاکستان میں افغانستان سے دہشت گردی ہمارے لیے گہری تشویش کا باعث ہے۔
اے آر وائی نیوز کے مطابق نیشنل سیکیورٹی کونسل کے ترجمان جان کربی سے پریس کانفرنس کے دوران افغانستان سے پاکستان میں دہشت گرد حملوں پر سوال کیا گیا۔
جواب میں جان کربی نے کہا کہ پاکستان میں افغانستان سے دہشت گردی ہمارے لیے گہری تشویش کا باعث ہے اور پاکستان میں دہشت گردی کی سرگرمیوں سے ایک مہلک خطرہ ہے۔
انہوں نے کہا کہ بائیڈن نے افغان جنگ کے خاتمے کے بعد انسداد دہشت گردی صلاحیت برقرار رکھنے کو ترجیح دی، ہم نے کافی حد تک ثابت کیا انسداد دہشت گردی صلاحیت امریکا کے پاس موجود ہے اور یہ صلاحیت خطرے سے نمٹنے کے لیے کافی بہتر اور کارآمد ہے۔
جان کربی نے کہا کہ ہم نے القاعدہ رہنماؤں کو میدان جنگ سے نکالا جن میں ظواہری بھی شامل ہے، ہم خطے میں داعش کے رہنماؤں کا پیچھا کرچکے ہیں، عراق، شام میں داعش کیخلاف اپنے مفادات، فوج، تنصیبات کا دفاع کیا۔
جب جان کربی سے بھارتی ایجنٹس کے امریکا میں سکھ رہنما کی قاتلانہ سازش پر سوال کیا گیا تو انہوں نے کہا کہ بھارت اہم پارٹنر ہے، ہم ہندوستان کے اچھے دوست اور اچھے شراکت دار ہیں پر اس کے باوجود ہمیشہ اپنے خدشات کا اظہار کیا۔
ان کا کہنا تھا کہ بھارت کے ساتھ تمام معاملات پر صاف گوئی سے بات کی ہے، سکھ رہنما قاتلانہ سازش پر بات کرنے سے کبھی کنارہ کشی اختیار نہیں کی۔
