لاہور: انگلش کپتان جوز بٹلر کا کہنا ہے کہ اس پچ پر کسی ہدف کا تعاقب کرنا مشکل کام ہے۔
آئی سی سی چیمپئنز ٹرافی میں افغانستان کے خلاف میچ سے قبل انگلش کپتان جوز بٹلر نے نیوز کانفرنس کرتے ہوئے کہا کہ پہلے میچ میں بولرز کو کافی اسکور پڑا، کوشش ہوگی افغانستان کے خلاف کم بیک کریں۔
انہوں نے کہا کہ ہیری بروک بہترین کھلاڑی ہیں ان سے اچھی اننگز کی امید ہے۔
جوز بٹلر کا کہنا تھا کہ کرس کی انجری کا دکھ ہے، کوشش کریں گے آئندہ میچ میں غلطیاں نہ دہرائیں، بہترین کرکٹ کھیل کر اگلا میچ جیتنے کی کوشش کریں گے۔
انگلش کپتان کا کہنا تھا کہ امید ہے کہ کل کے میچ میں دونوں ٹیمیں اچھی کرکٹ کھیلیں گی۔
واضح رہے کہ چیمپئنز ٹرافی میں انگلینڈ کو پہلے میچ میں آسٹریلیا سے شکست کا سامنا کرنا پڑا تھا جبکہ افغانستان کو جنوبی افریقا نے شکست دی تھی۔
گروپ بی میں آسٹریلیا اور جنوبی افریقا تین، تین پوائنٹس کے ساتھ بالترتیب پہلے اور دوسرے نمبر پر موجود ہیں، انگلش ٹیم تیسرے اور افغانستان چوتھے نمبر پر موجود ہے۔
