اسلام آباد: وفاقی وزیر خزانہ محمد اورنگزیب کی پوسٹ بجٹ کانفرنس شروع ہونے سے قبل صحافی واک آؤٹ کر گئے۔
صحافیوں نے فیڈرل بورڈ آف ریونیو (ایف بی آر) کی جانب سے فنانس بل (بجٹ 26-2025) پر بریفنگ نہ دینے پر وزیر خزانہ محمد اورنگزیب کی پوسٹ بجٹ کانفرنس سے واک آؤٹ کیا۔
بعدازاں، وفاقی وزیر اطلاعات و نشریات عطا اللہ تارڑ کانفرنس میں پہنچے اور صحافیوں کو بتایا کہ آپ بالکل درست ہیں میں آپ کے احتجاج میں شامل ہونے آیا ہوں۔
عطا اللہ تارڑ نے کہا کہ میں ان سے بات کروں گا ٹیکنیکل بریفنگ ضرور ہونی چاہیے، ایف بی آر بریفنگ کے حوالے سے صحافیوں کے تحفظات درست ہیں۔
بعدازاں چیئرمین ایف بی آر نے صحافیوں کو ٹیکنیکل بریفنگ کی یقین دہانی کروائی، عطا اللہ تارڑ کی معذرت کے بعد صحافیوں نے کانفرنس کا بائیکاٹ ختم کر دیا۔
پوسٹ بجٹ کانفرنس میں وفاقی وزیر خزانہ محمد اورنگزیب کا کہنا تھا کہ 26-2025 میں تنخواہ دار طبقے کو جتنا ریلیف دے سکتے تھے ہم نے دیا ہے، ارکان پارلیمنٹ کی تنخواہوں میں ہر سال اضافہ ہونا چاہیے۔
انہوں نے کہا کہ تنخواہوں اور پنشن کا براہ راست تعلق مہنگائی سے ہوتا ہے، ہم مالی گنجائش کے مطابق ہی ریلیف دے سکتے ہیں، حکومت کی پوری کوشش ہے جتنا ہو سکے ریلیف دیا جائے، پنشن کے حوالے سے بھی اصلاحات کی ہیں۔
