واشنگٹن: امریکی عدالت نے یہ کہتے ہوئے ایلون مسک کی ٹیم کو حکومتی نظام تک رسائی سے روک دیا ہے کہ حساس معلومات کے غلط استعمال کا خدشہ ہے۔
غیر ملکی میڈیا رپورٹس کے مطابق کھربوں ڈالرز کی ادائیگی کرنے والے حکومتی نظام سے متعلق حساس معلومات افشا ہونے کے خدشے کے پیش نظر امریکی عدالت کے جج نے ایلون مسک کی ٹیم کو حکومتی نظام تک رسائی سے روک دیا۔
امریکا کے وفاقی جج نے مسک کے محکمہ برائے حکومتی کارکردگی (ڈی او جی ای) کو محکمہ خزانہ کے ریکارڈ میں موجود لاکھوں امریکیوں کے ذاتی مالیاتی ڈیٹا تک رسائی سے روکا ہے۔
19 ریاستوں کے ڈیموکریٹک اٹارنی جنرلز کی جانب سے ایلون مسک کی ٹیم کے خلاف مقدمہ دائر کیا گیا تھا، جس میں انھوں نے انھوں نے دلیل دی کہ مسک ایک ’خصوصی سرکاری ملازم‘ ہیں اور ڈوج سرکاری محکمہ نہیں ہے، اس لیے انھیں رسائی دینا وفاقی قانون کی خلاف ورزی ہے۔ مقدمے پر مختصر فیصلے میں عدالت نے قرار دیا کہ محکمہ خزانہ میں لاکھوں شہریوں کے ڈیٹا تک رسائی دینا قانونی طور پر ممکن نہیں ہے۔ جج نے حکم دیا کہ مسک اور ڈوج (doge) کمپنی اپنے پاس موجود ریکارڈ فوری طور پر تلف کر دے۔
ٹرمپ نے ’برے لوگ‘ قرار دے کر انٹونی بلنکن کی سیکیورٹی بھی ختم کر دی
مسک نے عدالتی فیصلے پر برہمی کا اظہار کرتے ہوئے اسے پاگل پن قرار دے دیا اور جج کو سرگرم کارکن بھی کہا، ایلون مسک کا کہنا تھا کہ ٹیکس دہندگان کی رقم فراڈ سے کیسے بچائیں گے، اگر اس کے استعمال کا پتا نہ ہو۔
