اسلام آباد: جوڈیشل کمیشن آف پاکستان نے 7 رکنی آئینی بینچ تشکیل دے دیا۔ سینئر ترین جج جسٹس امین الدین بینچ کے سربراہ ہوں گے۔
جسٹس امین الدین خان اور جسٹس عائشہ ملک کا پنجاب سے آئینی بینچ کیلیے تقرر کر دیا گیا جبکہ جسٹس نعیم اخترافغان اور جسٹس جمال مندوخیل بلوچستان سے بینچ میں شامل ہیں۔
اسی طرح جسٹس محمد علی مظہر اور جسٹس حسن اظہر رضوی سندھ سے آئینی بینچ میں شامل ہیں جبکہ جسٹس مسرت ہلالی خیبر پختونخوا سے بینچ میں شامل ہیں۔
جوڈیشل کمیشن نے 5-7 کے تناسب سے تقرر کیا ہے۔
ذرائع نے اے آر وائی نیوز کو بتایا کہ سینئر ترین جج جسٹس امین الدین آئینی بینچ کے سربراہ ہوں گے۔ جوڈیشل کمیشن اجلاس میں تجویز آئی کہ تمام سپریم کورٹ ججز کو آئینی بینچ کیلیے نامزد کیا جائے۔
ذرائع نے بتایا کہ 5 ممبران نے 7 رکنی آئینی بینچ کی تشکیل کی مخالفت میں ووٹ دیا تاہم مخالفت کرنے والے ممبران کی رائے تھی آئینی کیسز کیلیے فل کورٹ بنایا جائے۔
چیف جسٹس پاکستان یحییٰ آفریدی، جسٹس منصور علی شاہ اور جسٹس منیب اختر اختلافی رائے دینے والوں میں شامل ہیں۔ عمر ایوب اور شبلی فراز نے بھی 7 رکنی آئینی بینچ کی تشکیل کی مخالفت میں ووٹ دیا۔
جوڈیشل کمیشن کا آئندہ اجلاس 2 ہفتے بعد دوبارہ ہوگا جس میں سندھ ہائیکورٹ کے آئینی بینچز کیلیے ججز نامزد کیے جائیں گے۔
