بھارتی ادارے ہورون انڈیا نے بھارت کی امیر ترین شخصیات کی فہرست جاری کردی ہے جس میں شوبز انڈسٹری کے کئی فنکار بھی شامل ہیں۔
بھارتی ادارے ہورون انڈیا کی رچ لسٹ میں انٹرٹینمنٹ انڈسٹری کی بھی متعدد شخصیات شامل ہیں جن میں شاہ رخ خان سرفہرست ہیں تاہم امیر ترین بھارتی اداکارہ کے نام نے سب کو حیران کردیا ہے۔
ہورون انڈیا رچ لسٹ 2024 کے مطابق بھارت میں امیر افراد کی تعداد میں اضافہ ہوا ہے اور بھارت میں ایک ہزار 539 افراد ایسے ہیں جن کے پاس ہزار کروڑ سے زائد کے اثاثے ہیں۔
ہورون انڈیا رچ لسٹ کی جانب سے کیے گئے انکشاف کے مطابق بالی ووڈ کے کنگ شاہ رخ خان 7300 کروڑ بھارتی روپے کے اثاثوں کے ساتھ بھارت کے سب سے امیر اداکار ہیں۔
تاہم بھارت کی امیر ترین اداکارہ نہ تو ایشوریا رائے ہیں، نہ ہی دپیکا، پریانکا، کترینہ نہ کاجل ہے بلکہ وہ اداکارہ ہیں جو اب بہت کم فلموں میں نظر آتی ہیں یہ اداکارہ شاہ رخ خان کے ساتھ بہت سی فلموں میں کام کرچکی ہیں۔
بھارت کی امیر ترین اداکارہ جوہی چاولہ ہیں جو کہ 4 ہزار 600 کروڑ بھارتی روپے کے اثاثوں کی مالک ہیں، 90 کی دہائی سے فلمی کیریئر کا آغاز کرنے والی جوہی چاولہ نے متعدد ہٹ فلموں میں کام کیا ہے۔
سن 2000 میں جوہی چاولہ نے فلم پروڈکشن کے شعبے میں قدم رکھا، وہ شاہ رخ کی کمپنی ریڈ چلی انٹرٹینمنٹ میں پارٹنر بھی ہیں، اس کے علاوہ وہ شاہ رخ خان کے ساتھ ہی آئی پی ایل کی امیر ترین ٹیم کلکتہ نائٹ رائیڈرز کی شریک مالک ہیں۔
واضح رہے کہ جوہی چاولہ نے 1995 میں بھارتی صنعت کار جے مہتا سے شادی کی تھی جن سے اب ان کے دو بچے ایک بیٹا اور ایک بیٹی ہے۔
