جمعیت علمأ اسلام (ف) نے باقاعدہ کسی سیاسی اتحاد میں نہ جانے کا فیصلہ کیا ہے۔

تفصیلات کے مطابق جے یو آئی کی مرکزی مجلس عمومی کے اجلاس میں فیصلہ کیا گیا ہے کہ جے یو آئی اپنے پلیٹ فارم سے سیاسی جدوجہد جاری رکھے گی اور کسی سے سیاسی اتحاد نہیں کیا جائے گا۔

اجلاس میں فیصلہ کیا گیا کہ جمعیت علماء اسلام فلسطینیوں کی جدوجہد آزادی کی حمایت بھرپور انداز میں جاری رکھے گی۔ اس سلسلہ میں 27 اپریل کو لاہور، 11 مئی کو پشاور اور 15 مئی کو کوئٹہ میں شہداء غزہ ملین مارچ کیے جائیں گے۔

’جے یو آئی بڑی جماعت ہے ان کا جو بھی فیصلہ ہوگا قبول ہوگا‘

اجلاس ملک میں امن وامان کی بدترین صورتحال کی شدید الفاظ میں مذمت کرتا ہے، حکومتی اور ریاستی ادارے عوام کی جان ومال کو تحفظ فراہم کرنے میں مکمل ناکام نظر آتے ہیں۔ دھاندلی کے نتیجے میں قائم مرکزی اور صوبائی حکومتیں عوام کے مسائل کے حل اور امن وامان کے قیام میں مکمل ناکام ہوچکی ہیں ۔

جمعیت علماء اسلام پرزور الفاظ میں ازسرنو صاف اور شفاف انتخابات کے مطالبہ کا اعادہ کرتی ہے البتہ مشترکہ امور پر مختلف مذہبی اور پارلیمانی اپوزیشن جماعتوں کے ساتھ جدوجہد کی حکمت عملی مرکزی مجلس شوری یا مرکزی مجلس عاملہ طے کرے گی۔