اسلام آباد: جسٹس منصور علی شاہ نے بطور انتظامی جج سپریم کورٹ ذمے داریاں ادا کرنے سے معذرت کر لی۔
ذرائع کے مطابق جسٹس منصور علی شاہ کے پاس انتظامی فائلیں بھیجی گئیں تو انہوں نے انتظامی فائلوں پر دستخط کرنے سے انکار کر دیا۔
ذرائع کا کہنا ہے کہ جسٹس منصور علی شاہ نے فائلز واپس بھجواتے ہوئے کہا کہ میں انتظامی جج سے سبکدوش ہوچکا ہوں۔
سابق چیف جسٹس قاضی فائز عیسیٰ نے منصور علی شاہ کو منتظم جج سپریم کورٹ مقرر کیا تھا۔
یاد رہے کہ 26 ویں آئینی ترمیم کے بعد چیف جسٹس اور سپریم کورٹ کے ججز کی تقرری کے طریقہ کار میں تبدیلی کے بعد پاکستان کی تاریخ میں پہلی مرتبہ پارلیمانی کمیٹی نے چیف جسٹس کے لیے جسٹس یحییٰ آفریدی کا انتخاب کیا تھا اور سینئر ترین جج جسٹس منصور علی شاہ چیف جسٹس نہیں بن سکے تھے۔
