اسلام آباد : جسٹس منصور علی شاہ نے اپنے خلاف ریفرنس سے متعلق سوال پر کہا کچھ غلط کیا ہی نہیں توریفرنس کا ڈر کیوں ہونا جب آئے گا تب دیکھا جائے گا۔
تفصیلات کے مطابق جسٹس منصور علی شاہ نے صحافیوں سے غیر رسمی گفتگو کی ، اس دوران صحافی نے سوال کیا ‘کہا جاتا ہے آپ لوگ کام نہیں کرتے’؟ تو جسٹس منصور نے کہا کہ مقدمات نمٹانے کی شرح دیکھ لیں، کس کے کتنے فیصلے قانون کی کتابوں میں شائع ہوئے سب کے سامنے ہے۔
جسٹس منصور کا کہنا تھا کہ تمام ریکارڈ سپریم کورٹ کی ویب سائٹ پر موجود ہے ، ابھی تو حلف برداری کے بعد چائے پینے آیا ہوں۔
صحافی نے سوال کیا سنا ہے آپ کے خلاف ریفرنس آ رہا ہے؟ تو جواب میں انھوں نے کہا کہ جب ریفرنس آئے گا تب دیکھی جائے گی، کچھ غلط کیا نہیں تو ریفرنس کا ڈر کیوں ہونا،اللہ مالک ہے۔
جسٹس منصور کا مزید کہنا تھا کہ کسی سے کوئی ذاتی عناد یا اختلاف نہیں، کمرے میں موجود ہاتھی کسی کونظر نہ آئے تو کیا کہہ سکتے ہیں، باقی تمام ججز کیساتھ ملاقات ہوتی ہے، اکٹھے چائے بھی پیتے ہیں۔
