اسلام آباد : اسلام آباد ہائی کورٹ کے جسٹس میاں گل حسن اورنگزیب نے نکاح کیس میں ریمارکس دیئے اگر خاورمانیکا کے وکیل نہیں آتے تو ریکارڈ دیکھ کر فیصلہ کردوں گا۔
تفصیلات کے مطابق اسلام آباد ہائیکورٹ میں نکاح کیس میں اپیل کا فیصلہ ایک ماہ میں کرنے کی ڈائریکشن پر نظرثانی کی درخواست پر سماعت ہوئی۔
جسٹس میاں گل حسن اورنگزیب نے خاور مانیکا کی درخواست پر سماعت کی، معاون وکیل نے بتایا کہ سینئروکیل رضوان عباسی سپریم کورٹ میں مصروف ہیں،کچھ دیرکاوقفہ کر دیں۔
سلمان اکرم راجہ نے کہا کہ خاور مانیکا کے وکیل نے لکھا ہے وہ زیارت کیلئے عراق ایران جانا چاہتےہیں، اس لیے ایک ماہ کی ڈائریکشن ختم کی جائے۔
جس پر جسٹس میاں گل حسن اورنگزیب کا کہنا تھا کہ ساڑھے 11 بجے کیس دوبارہ ٹیک اپ کریں گے ، رضوان عباسی آ گئے تو ان کے دلائل سنیں گے اور اگر خاورمانیکا کے وکیل نہیں آتے تو ریکارڈ دیکھ کر فیصلہ کردوں گا۔
وکیل سلمان اکرم راجہ نے بتایا کہ آج 9 جولائی ہے 12 جولائی فیصلہ کرنےکی ڈیڈلائن ہے، بعد ازاں عدالت نے کیس کی سماعت میں وقفہ کر دیا
گذشتہ روز اسلام آباد کے سیشن کورٹ میں دوران عدت نکاح کے کیس کی سماعت ہوئی تھی ، خاور مانیکا کی جانب سے سماعت کی جنرل التوا کی درخواست پر جج افضل مجوکا نے کہا اسلام آباد ہائیکورٹ کے شیڈول کا پابند ہوں، اس میں تبدیلی نہ کی تو شیڈول کے مطابق فیصلہ کروں گا، اسلام آباد ہائیکورٹ کہے آج فیصلہ کرنا ہے تو میں سنادوں گا۔
