پاکستانی شوبز انڈسٹری کی سینئر اداکارہ جویریہ عباسی نے دوسری شادی کی تصدیق کردی، اداکارہ نے دوسرے نکاح کی تصاویر اور ویڈیوز منظرِ عام پر آگئیں۔
اداکارہ جویریہ عباسی نے فوٹو اینڈ شیئرنگ ایپ انسٹاگرام پر اپنے نکاح کی چند تصاویر اور ویڈیوز شیئر کیں جس میں اداکارہ کو خاص موقع پر گلابی اور گولڈن رنگ کے خوبصورت لباس میں دیکھا جاسکتا ہے۔
اداکارہ کی جانب سے شیئر کی گئی ایک ویڈیو میں اُنہیں ہاتھ میں چمیلی اور گلاب کے پھولوں والے گجرے پہنائے جارہے ہیں جبکہ ایک ویڈیو میں جویریہ عباسی کا نکاح پڑھایا جارہا ہے۔
View this post on Instagram
اداکارہ اپنی دوسری شادی کے موقع پر بے حد خوش نظر آرہی ہیں لیکن جویریہ عباسی نے اپنے شوہر کی تصاویر انسٹاگرام پر پوسٹ نہیں کیں۔
جویریہ عباسی نے اپنی پوسٹ کے کیپشن میں لکھا کہ ’’ ہم خوشی سے محبت کرتے ہیں ‘‘،تصاویر سوشل میڈیا پر وائرل ہونے کے بعد شوبز شخصیات اور مداحوں کی جانب سے اداکارہ کو دوسری شادی کی مبارکباد دی جارہی ہیں۔
خیال رہے کہ مئی میں اداکارہ نے ایک رِیل کے ذریعے اپنی دوسری شادی کا اعلان کیا تھا، انہوں نے ویڈیو کے کیپشن میں انگریزی لفظ ’’بیگننگ‘‘ یعنی ’آغاز‘ لکھا تھا اور ویڈیو پر بھارتی گلوکار انوو جین کا گانا لگایا تھا۔
واضح رہے کہ جویریہ عباسی نے پہلی شادی اداکار شمعون عباسی سے 1997 میں کی تھی، دونوں نے 2007 میں علیحدگی اختیار کرلی تھی اور ان کی ایک بیٹی عنزیلہ عباسی ہیں۔
