کراچی میں موسلا دھار بارش کے بعد کے الیکٹرک کے 350 سے زائد فیڈرز بند ہوگئے۔
کراچی کے مختلف علاقوں میں موسلا دھار بارش کا سلسلہ جاری ہے جس کے باعث کے الیکٹرک کے 350 سے زائد فیڈرز ٹرپ ہوگئے اور بجلی کی فراہمی معطل ہوگئی۔
ڈی ایچ اے، گلشن اقبال، گلستان جوہر، سرجانی ٹاؤن، اورنگی اور بلدیہ ٹاؤن سمیت متعدد علاقوں میں بجلی منقطع ہوگئی۔
کے الیکٹڑک نے ابھی تک بہت سے متاثرہ علاقوں میں بجلی کو مکمل طور پر بحال نہیں کیا ہے جس سے شہریوں کی مشکلات میں اضافہ ہوگیا ہے۔
گزشتہ تین دنوں کے دوران شہر بھر میں 1110 سے زائد فیڈرز ٹڑپ کرگئے جس سے گلبہار، ناظم آباد، لانڈھی، کورنگی، سائٹ اور گڈاپ کے علاقے متاثر ہوئے ہیں۔
علاوہ ازیں محکمہ موسمیات نے کراچی میں بارشوں کے تفصیلی اعدادوشمار جاری کردیے ہیں۔
اعداد و شمار کے مطابق سب سے زیادہ بارش گلشن معمار میں ریکارڈ کی گئی جہاں 23 ملی میٹر بارش ہوئی ہے۔ سرجانی ٹاؤن میں 22 ملی میٹر اور سعدی ٹاؤن میں 17 ملی میٹر بارش ریکارڈ کی گئی۔
یونیورسٹی روڈ پر 11 ملی میٹر جبکہ شاہراہ فیصل پر 9 ملی میٹر بارش ریکارڈ کی گئی۔
