کراچی: کےالیکٹرک نے شہریوں کو خبردار کیا ہے کہ وہ بجلی کے بنیادی ڈھانچے، خاص طور پر ہائی ٹینشن ٹرانسمیشن لائنز کے قریب پتنگ بازی سے گریز کریں۔
کسی بھی ممکنہ حادثے اور بجلی کی فراہمی میں خلل سے بچنے کے لیے کے الیکٹرک نے شہریوں سے درخواست کی ہے کہ وہ بجلی کے تاروں کے قریب پتنگ بازی سے احتیاط برتیں، پتنگ بازی کے دوران اکثر دھات، کیمیکل یا شیشے سے بنی ڈور کا استعمال کیا جاتا ہے۔
اس طرح کی ڈوروں کا استعمال جان لیوا حادثات اور بجلی کے تعطل کا سبب بن سکتا ہے، خاص طور پر ان علاقوں میں جہاں بجلی کا انفراسٹرکچر موجود ہو۔
کےالیکٹرک کے سینئر ڈائریکٹر کارپوریٹ کمیونیکیشنز عمران رانا نے کہا ہے کہ ہر تفریحی سرگرمی خوشی کا باعث ہونی چاہیے، نہ کہ حادثے یا پریشانی کا سبب۔ پتنگ بازی میں استعمال ہونے والی دھاتی یا کیمیکل ڈور بجلی کو معطل کرتی ہے۔
اگر یہ ہائی ٹینشن لائنز کے قریب موجود ہو تو بغیر کسی براہ راست رابطے کے بھی کرنٹ لگنے کا خطرہ رہتا ہے، جو سنگین چوٹ یا جان لیوا حادثے کا سبب بن سکتا ہے۔
ہم شہریوں سے اپیل کرتے ہیں کہ رمضان المبارک کی روح کو اپناتے ہوئے ایسی سرگرمیوں سے گریز کریں جو ان کی یا دوسروں کی جان کو خطرے میں ڈال سکتی ہیں۔
کےالیکٹرک نے متعلقہ حکام، بشمول شہر کی انتظامیہ، قانون نافذ کرنے والے اداروں اور کمیونٹی رہنماؤں سے بھی درخواست کی ہے کہ وہ خاص طور پر بچوں میں اس خطرناک کھیل کی حوصلہ شکنی کے لیے اپنا کردار ادا کریں۔
بجلی کمپنی نے شہریوں سے گزارش کی ہے کہ اگر وہ بجلی کی لائنوں کے قریب خطرناک پتنگ بازی ہوتے دیکھیں تو فوراً کےالیکٹرک کی ہیلپ لائن 118، KE Live ایپ یا کےالیکٹرک کے آفیشل سوشل میڈیا پلیٹ فارمز پر اطلاع دیں۔
