اسلام آباد: کراچی میں بجلی کی تقسیم کار کمپنی کے الیکٹرک کے لائسنس کی مدت 20 سال بعد آخر کار ختم ہونے والی ہے۔

تفصیلات کے مطابق کے الیکٹرک کے لائسنس کی بیس سالہ مدت ختم ہونے والی ہے، جس پر کمپنی نے ڈسٹری بیوشن لائسنس کی تجدید کے لیے نیشنل الیکٹرک پاور ریگولیٹری اتھارٹی (نیپرا) سے رجوع کر لیا ہے۔

کے الیکٹرک کی جانب سے نیپرا میں مزید 20 سال کے لیے ڈسٹری بیوشن لائسنس کی تجدید کی درخواست دائر کی گئی ہے، درخواست کے مطابق کے الیکٹرک کے لائسنس کی 20 سالہ مدت 20 جولائی 2023 کو ختم ہو رہی ہے۔

نیپرا سے درخواست کی گئی ہے کہ لائسنس میں مزید 20 سال 20 جولائی 2043 تک توسیع کی جائے، کے الیکٹرک نے کہا کہ وہ 34 لاکھ صارفین کو خدمات فراہم کر رہا ہے، لائسنس کی تجدید صارفین اور الیکٹرک پاور انڈسٹری کے مفاد میں ہے۔

درخواست موصول ہونے کے بعد نیپرا نے تمام اسٹیک ہولڈرز اور شہریوں سے اس پر 14 روز میں رائے طلب کر لی ہے۔