کراچی : کے الیکٹرک نے شہر کراچی میں بجلی کی لوڈ شیڈنگ نئے شیڈول پر فوری عملدرآمد شروع کردیا، نئے شیڈول کے مطابق کے الیکٹرک نے لوڈ شیڈنگ کے دورانیے میں 3 سے 6 گھنٹے کا اضافہ کیا۔
تفصیلات کے مطابق کے الیکٹرک نے اپنے نئے شیڈول کے تحت رات 12 بجے سے پورے کراچی میں مرحلہ وار ایک سے ڈیڑھ گھنٹے کو لوڈ شیڈنگ شروع کردی۔
کے الیکٹرک کی جانب سے شہر بھر میں ایک ساتھ لوڈ شیڈنگ شروع ہوتے ہی موبائل فون اور انٹرنیٹ سروس بھی متاثر ہوئیں۔
وقفے وقفے سے لوڈ شیڈنگ کی وجہ سے موبائل ٹاورز کے جنریٹرز نے بھی جواب دے دیا، لوڈ شیڈنگ کی وجہ شہر کے مختلف علاقوں میں موبائل فونز کے سگنل متاثر ہونے لگے۔
کے الیکٹرک نے مستثنیٰ علاقوں میں بھی رات میں دو بار ایک سے ڈیڑھ گھنٹے کی لوڈ شیڈنگ کی جبکہ پہلے سے لوڈ شیڈنگ والے علاقوں میں رات کو 2 سے 4 گھنٹے لوڈ شیڈنگ کی جا رہی ہے۔
شدید گرمی میں لوڈ شیڈنگ کی وجہ سے شہریوں کو مشکلات کا سامنا کرنا پڑا، شدید گرمی میں بجلی غائب ہونے سے شہری رات سڑکوں اور فٹ پاتھوں پر گزارنے پر مجبور ہو گئے۔
