کراچی کے شہریوں کے لیے اچھی خبر ہے کہ کےالیکٹرک نے 5.02 روپے فی یونٹ کمی کی درخواست دے دی۔

کےالیکٹرک نے مارچ  کیلئے فیول چارج ایڈجسٹمنٹ کی مد میں قیمت کم کرنے کی درخواست نیپرا میں جمع کرائی ہے۔

کےالیکٹرک صارفین کو 5.02 روپے فی یونٹ ریلیف ملنے کا امکان ہے۔ نیپرا 22مئی 2025 کو عوامی سماعت کے بعد درخواست پر حتمی فیصلہ جاری کرے گی۔

قبل ازیں نیشنل الیکٹرک پاور ریگولیٹری اتھارٹی (نیپرا) نے کے۔الیکٹرک کے فروری 2025 کے عارضی ماہانہ فیول چارج ایڈجسٹمنٹ (ایف سی اے) کی درخواست پر فیصلہ جاری کر دیا ہے، جس کے تحت صارفین کو بجلی کے بلوں میں 3.64 روپے فی یونٹ کا ریلیف دیا گیا ہے جسے مئی 2025کے بلوں کے ذریعے صارفین کو منتقل کیا جائے گا۔

نیپرا نے جنریشن ٹیرف کے حوالے سے اپنے فیصلے میں جو جولائی 2023 سے کنٹرول پیریڈ کے لیے ہے، فروری 2025 کے ایف سی اے سے جزوی لوڈ، اوپن سائیکل اور ڈیگریڈیشن کروز کے ساتھ ساتھ اسٹارٹ اَپ لاگت کے حوالے سے 3 ارب روپے کی عارضی رقم برقرار رکھی ہے اور ان اخراجات کو منفی فیول کاسٹ ویری ایشن سے ایڈجسٹ کرنے کی اجازت دی گئی ہے، تاکہ مستقبل میں صارفین پر اضافی بوجھ نہ پڑے۔