کرنٹ لگنے سے نوجوان کی ہلاکت: کے الیکٹرک پر ڈیڑھ کروڑ ہرجانے کا دعویٰ

کراچی: صوبہ سندھ کے دارالحکومت کراچی میں کرنٹ لگنے سے ہلاک ہونے والے شہری کے ورثا نے بجلی کے تقسیم کار ادارے کے الیکٹرک پر 1 کروڑ 44 لاکھ روپے ہرجانے کا دعویٰ دائر کردیا۔

تفصیلات کے مطابق کراچی کے علاقے بلدیہ ٹاؤن میں کرنٹ لگنے سے ہلاک ہونے والے شہری کے ورثا نے مقامی عدالت میں کیس دائر کردیا، ورثا کی جانب سے کے الیکٹرک کے خلاف ایک کروڑ 44 لاکھ روپے ہرجانے کا دعویٰ کیا گیا ہے۔

درخواست گزار کے وکیل کا کہنا ہے کہ سنہ 2018 میں بارشوں کے دوران شہزاد کرنٹ لگنے سے جاں بحق ہوگیا تھا۔

والد کا کہنا ہے کہ شہزاد گھر کا اکیلا کمانے والا تھا، اس کی موت سے ہمارا گھر اجڑ گیا ہے۔

عدالت نے کے الیکٹرک کو شوکاز نوٹس جاری کرتے ہوئے جواب طلب کیا ہے جبکہ آئندہ سماعت پر کے الیکٹرک کے وکیل سے دلائل بھی طلب کیے گئے ہیں۔