کابلی پلاؤ افغانی پکوان ہے جو ابلے ہوئے چاولوں میں دال مسور، کشمش، گاجریں اور بھیڑ کا گوشت ملا کر تیار کیا جاتا ہے۔ افغانستان کا یہ پکوان دنیا بھر میں مقبول ہے اور اسے افغانستان کا قومی پکوان تصور کیا جاتا ہے۔
آج ہم آپ کو میٹھے اور نمکین کے اس لذیذ امتزاج یعنی کابلی پلاؤ بنانے کی ترکیب بتا رہے ہیں۔
اجزا
چاول: 1 کلو
بکرے کی چانپ: ڈیڑھ کلو
تیل: 750 گرام
دہی: نصف کپ
نمک: حسب ذائقہ
پیاز (تل کر سنہری کرلیں): 1 عدد
پیاز (کٹی ہوئی): 2 عدد
ادرک (چوپ کرلیں): 2 انچ کا ٹکڑا
کشمش (تلی ہوئی): ایک چوتھائی کپ
لہسن کے جوئے (چوپ کرلیں): 10 عدد
بادام (کٹے اور تلے ہوئے): نصف کپ
لیموں کا رس: 2 کھانے کے چمچ
ثابت دھنیہ: 2 چائے کے چمچ
زعفران، کیوڑا: تھوڑا سا
سونف: 2 چائے کے چمچ
ادرک لہسن پیسٹ: 1 چائے کا چمچ
ثابت گرم مصالحہ: تھوڑا سا
پانی: 8 کپ
ترکیب
سب سے پہلے چانپوں کو دھو کر اس میں پانی نمک، ادرک، لہسن، پیسٹ، کٹی ہوئی پیاز، دھنیہ اور سونف ڈال کر تقریباً 1 گھنٹے تک پکائیں۔
جب چانپیں گل جائیں تو انہیں نکال کر گرم تیل میں فرائی کر کے ایک پلیٹ میں رکھ لیں۔ چانپوں کی یخنی کو چھان کر علیحدہ رکھیں۔
زعفران اور کیوڑے کو مکس کرلیں۔
ایک پتیلی میں تیل گرم کریں۔
ثابت گرم مصالحہ چوپ کیا ہوا ادرک لہسن اور دہی ڈال کر بھون لیں اور اس میں یخنی ڈال کر پکائیں۔
جب ابال آنے لگے تو بھگوئے ہوئے چاول ڈالیں۔
5 منٹ تیز آگ پر پکائیں پھر نمک ڈال کر آگ کم کردیں۔
جب پانی خشک ہوجائے تو چانپ ڈال کر دم پر رکھیں۔
ڈش میں پہلے چاول، پھر اوپر چانپیں، پھر تلی ہوئی پیاز، تلی ہوئی کشمش، بادام، زعفران ملا کیوڑا اور لیموں کا رس ڈال کر سرونگ ڈش میں نکالیں۔
مزیدار کابلی پلاؤ تیار ہے۔
