ممبئی: بالی وڈ کے سُپر اسٹار سلمان خان پر اکثر تنقید کے تیر چلانے والے خود ساختہ فلمی ناقد کمال آر خان نے اداکار سے سرِ عام معافی مانگ لی۔
کمال آر خان نے اپنے آفیشل ٹوئٹر ہینڈل سے لکھا کہ میں میڈیا سے تعلق رکھنے والے تمام لوگوں کو آگاہ کرتا ہوں کہ میری گرفتاری کے پیچھے سلمان خان کا ہاتھ نہیں تھا بلکہ اس پر کوئی اور کھیل گیا۔
فلمی ناقد نے لکھا: ’بھائی جان (سلمان خان)، میں غلط فہمی پر آپ سے معذرت چاہتا ہوں۔ اگر میں نے آپ کو کوئی تکلیف پہنچائی تو مجھے معاف کر دیں۔‘
انہوں نے یہ بھی بتایا کہ میں نے رضاکارانہ طور پر یہ فیصلہ کیا ہے کہ آپ کی کسی فلم پر منفی تنصرہ نہیں کروں گا۔
I want to inform all media ppl that #SalmanKhan was not behind my arrest as I thought. Peeche Se Koi Aur Khel Kar Gaya. Bhai jaan @BeingSalmanKhan I am really sorry for misunderstanding you. And I apologise if I did hurt you in anyway. I voluntarily decide to not review ur films.
— KRK (@kamaalrkhan) October 30, 2022
ایک اور ٹوئٹ میں کمال آر خان نے واضح کیا کہ اکثر لوگ سمجھتے ہیں کہ میری گرفتاری کے پیچھے فلم ساز کرن جوہر کا ہاتھ ہے، میں پھر سے کہہ رہا ہوں کہ ایسا کچھ نہیں ہے۔
یاد رہے کہ کمال آر خان کو رواں سال اگست میں ممبئی ایئرپورٹ پر پولیس نے گرفتار کرلیا تھا۔ ان کے خلاف سیاسی جماعت شیو سینا کے رکن راہول کنال نے سال 2020 میں متنازع ٹوئٹس کرنے پر مقدمہ درج کروایا تھا۔
