واشنگٹن: امریکی صدر جو بائیڈن کی دستبرداری اور ان کی جگہ کملا ہیرس کے لیے حمایت کے اعلان کے بعد سے محض 7 گھنٹوں کے اندر ڈیموکرٹیک پارٹی نے 46.7 ملین ڈالر اکٹھے کر لیے۔
غیر ملکی میڈیا رپورٹس کے مطابق ڈیموکریٹک فنڈ ریزنگ آرگنائزیشن ’ایکٹ بلیو‘ نے ایک بیان میں کہا ہے کہ کملا ہیریس کی مہم کے آغاز کے چند ہی گھنٹوں میں چھوٹے عطیہ دہندگان نے صدارتی مہم میں 46.7 ملین ڈالر کا عطیہ دیا۔
گروپ کا کہنا ہے کہ یہ 2024 کا سب سے بڑا فنڈ ریزنگ دن تھا، بتایا جا رہا ہے کہ جو بائیڈن کے ہٹنے کے ساتھ ہی عطیہ دہندگان میں پارٹی کے ساتھ وابستگی کا جوش و خروش پھر سے تازہ ہو گیا ہے۔
ڈیلی میل کا کہنا ہے کہ ڈیموکریٹک پارٹی کے فنڈ ریزنگ بازو ’ایکٹ بلیو‘ کی طرف سے اعلان کردہ اس اعداد و شمار کا مطلب ہے کہ 59 سالہ کملا ہیرس نے اس انتخابی دور میں سب سے زیادہ رقم اکٹھی کرنے کا ریکارڈ توڑ دیا ہے۔
کملا ہیرس کی بطور صدارتی امیدوار نامزدگی پر ٹرمپ کا دلچسپ تبصرہ
خیال رہے کہ کملا ہیرس باضابطہ طور پر پارٹی کی نامزد امیدوار نہیں ہیں، لیکن وہ پہلے ہی بائیڈن، سابق صدر بل کلنٹن، سابق وزیر خارجہ ہلیری کلنٹن، کیلیفورنیا کے گورنر گیون نیوزوم، پینسلوینیا کے گورنر جوش شاپیرو اور ڈیموکریٹک کنگ میکر جارج سوروس کی توثیق حاصل کر چکی ہیں۔
برمنگھم یونیورسٹی میں بین الاقوامی سیاست کے پروفیسر سکاٹ لوکاس کا کہنا ہے کہ اگست میں ڈیموکریٹک نیشنل کنونشن ہونے والا ہے، اس میں کملا ہیرس بلامقابلہ نامزد ہو جائیں گی۔ لوکاس نے الجزیرہ کو بتایا کہ پارٹی کے اندر اتحاد پھر سے قائم ہو گیا ہے، ڈیموکریٹس کی مہم دوبارہ متحرک ہو گئی ہے، اور وہ مزید فنڈز حاصل کر سکتی ہے۔
