کراچی: قومی ٹیم کے وکٹ کیپر بیٹسمین کامران اکمل پاکستان کپ سے ڈراپ کیے جانے پر مایوس ہوگئے۔
تفصیلات کے مطابق قومی ٹیم کے سینئر کھلاڑی کامران اکمل نے سماجی رابطے کی ویب سائٹ ٹویٹر پر اپنے پیغام میں کہا ہے کہ کارکردگی دکھانے کے باوجود پاکستان کپ سے ڈراپ کیے جانے پر حیران ہوں۔
کامران اکمل نے کہا کہ ‘کارکردگی دکھانے کے باوجود مجھے ٹیم میں شامل نہ کرکے اچھا سلوک نہیں کیا گیا۔‘
انہوں نے اپنے ٹویٹ میں پاکستان کرکٹ بورڈ (پی سی بی) اور ڈائریکٹر ہائی پرفارمنس سینٹر ندیم خان کو مینشن کرتے ہوئے درخواست کی کہ وہ اس معاملے کو دیکھیں۔
Shocked & disappointed As a senior & season Player i have not been treated well.I request @TheRealPCB @NadeemKhanCC to look into the matter. Cricket is my passion and i want to play it BUT….I rest my case to My Allah.
— Kamran Akmal (@KamiAkmal23) January 7, 2021
کامران اکمل نے کہا کہ کرکٹ میرا جنون ہے، میں کھیلنا چاہتا ہوں لیکن میں اب اپنا معاملہ اللہ کے سپرد کرتا ہوں۔
واضح رہے کہ اوپنر احمد شہزاد اور وکٹ کیپر بیٹسمین کامران اکمل کو آج سے شروع ہونے والے پاکستان کپ ون ڈے ٹورنامنٹ میں سینٹرل پنجاب کی ٹیم سے ڈراپ کر دیا گیا۔
33 میچز پر مشتمل ٹورنامنٹ ڈبل لیگ کی بنیاد پر کھیلا جائے گا ۔ میچز کراچی کے تین وینیوز این بی پی اسپورٹس کمپلیکس ، اسٹیٹ بنک اسٹیڈیم اور یوبی ایل اسپورٹس کمپلیکس میں کھیلے جائیں گے ۔ اسٹیٹ بنک اسٹیڈیم 29 اور 30 جنوری کو سیمی فائنلز اور 31 جنوری کو فائنل کی میزبانی کرے گا۔
ٹورنامنٹ میں تقریبا 10 ملین روپے کی پرائز منی رکھی گئی ہے ٹورنامنٹ کی فاتح ٹیم کو 5 ملین روپے ملیں گے جبکہ رنرز اپ کو 2.5 ملین روپے دئیے جائیں گے۔
