لاہور: قومی ٹیم کے وکٹ کیپر بلے باز کامران اکمل نے کہا ہے کہ چیف سلیکٹر مصباح الحق سے سلیکشن کے حوالے سے کوئی رابطہ نہیں ہوا ہے۔
تفصیلات کے مطابق قومی ٹیم کے وکٹ کیپر بلے باز کامران اکمل نے میڈیا سے گفتگو کرتے ہوئے کہا کہ سلیکٹرز بہتر سمجھتے ہیں کے تینوں فارمیٹ میں کون بہتر رہے گا، اپنے آپ پر بھروسہ ہے اور جب تک کرکٹ کھیلنی ہے اچھی کھیلوں گا۔
انہوں نے کہا کہ پروفیشنل کرکٹر کے طور پر ہر وقت تیار رہنا لازمی ہے، پلاسٹک سرجری کا ایسا کوئی ماہر نہیں ملا جو میری پہچان بدل دے۔
کامران اکمل نے کہا کہ ملک میں ٹیلنٹ کی کمی نہیں ہے مناسب طریقے پر چلنے کی ضرورت ہے جس سے نئے کھلاڑی مل سکتے ہیں۔
مزید پڑھیں: نہیں جانتا کہ مجھے ٹیم میں شامل کیوں نہیں کیا گیا، کامران اکمل
واضح رہے کہ کامران اکمل طویل عرصے سے قومی ٹیم سے باہر ہیں، انہیں پرفارمنس خراب ہونے کی وجہ سے ٹیم سے ڈراپ کردیا گیا تھا اب وہ ڈومیسٹک میں پرفارم کرکے ٹیم میں دوبارہ جگہ بنانے کی کوشش کررہے ہیں۔
یاد رہے کہ چیف سلیکٹر نے کامران کے بھائی عمر اکمل کو سری لنکا کے خلاف ہوم سیریز میں موقع دیا تھا لیکن وہ خاطر خواہ کارکردگی نہ دکھاسکے تھے اور عمر کو دورہ آسٹریلیا سے ڈراپ کردیا گیا تھا۔
اس سے قبل ہیڈ کوچ اور چیف سلیکٹر مصباح الحق بارہا کہہ چکے ہیں کہ قومی ٹیم کے دروازے کسی کھلاڑی کے لیے بند نہیں ہوئے ہیں جو ٹیم میں آنا چاہتا ہے وہ ڈومیسٹک میں پرفارم کرکے آسکتا ہے۔
