کراچی: گورنر سندھ کامران ٹیسوری نے وفاق سے 100 ارب روپے وصول کرنے کیلیے وزیر اعلیٰ سندھ مراد علی شاہ کو فارمولا بتا دیا۔
یوم پاکستان کے موقع پر مزار قائد پر حاضری دینے کے بعد وزیر اعلیٰ کے ساتھ گفتگو کرتے ہوئے گورنر سندھ نے بتایا کہ میئر کراچی مرتضیٰ وہاب نے 100 ارب روپے دینے کیلیے خط لکھا، مراد علی شاہ سے کہتا ہوں ففٹی ففٹی کر لیتے ہیں، پچاس آپ دیں اور پچاس کا میں بندوبست کرتا ہوں۔
اس پر وزیر اعلیٰ نے کہا کہ میئر کراچی اور گورنر سندھ میں نوک جھونک رہتی ہے۔
اس سے قبل میئر کراچی نے اپنے بیان میں سوال کیا کہ گورنر صاحب 100 ارب لے کر آ رہے ہیں، ہم کام کرنے کیلیے ساتھ کھڑے ہو جائیں؟ وعدے اور اعلان نہیں کراچی کیلیے پیسے چاہئیں۔
انہوں نے کہا کہ مسئلہ تب حل ہوگا جب 100 ارب روپے کے ایم سی کے اکاؤنٹ میں آئیں گے، مجھے پیسے ملیں گے تو گورنر کو سلام پیش کروں گا۔
دو ہفتے قبل کامران ٹیسوری نے مرتضیٰ وہاب کو چیلنج دیا تھا کہ وہ 100 ارب روپے کے ترقیاتی منصوبوں کی سمری لائیں تو وہ وفاق سے رقم دلوا دیں گے۔
