کراچی : گورنر سندھ کامران ٹیسوری کراچی میں اسٹریٹ کرائم کی وارداتوں کی روک تھام کیلئے اپنا بھرپور کردار ادا کررہے ہیں انہوں نے وزیر اعظم سے بھی معاونت طلب کرلی۔
اس حوالے سے وزیراعظم شہبازشریف کے دورہ خیرپور کے موقع پرگورنر سندھ کامران ٹیسوری نے ان سے خصوصی ملاقات کی جس میں کراچی کے مسائل کو اجاگر کیا گیا۔
ذرائع کا کہنا ہے کہ ملاقات میں کراچی کی سیاسی صورتحال اور امن و امان کے مسائل سمیت دیگر اہم امور پر تبادلہ خیال کیا گیا۔
اس موقع پر گورنر سندھ کامران ٹیسوری نے کراچی میں بڑھتی ہوئی اسٹریٹ کرائم کی وارداتوں کا معاملہ وزیراعظم شہبازشریف کے سامنےاٹھا دیا۔
انہوں نے کہاکہ میری درخواست ہے کہ ان وارداتوں میں بے گناہ شہری اور نوجوان جان ومال دونوں سے محروم ہورہے ہیں وزیراعظم معاملے کو ضرور دیکھیں۔
گورنر سندھ نے وزیراعظم کو فوری کراچی آکر معاملے کو دیکھنے کی دعوت دی، ان کا کہنا تھا کہ پولیس کے مسائل ان کی تعداد، انٹیلی جنس نظام کو بہترکرنا ہوگا۔
ذرائع کے مطابق وزیراعظم شہبازشریف نے گورنر سندھ کی کراچی آنے کی دعوت قبول کرتے ہوئے کہا کہ جلد کراچی کا دورہ کروں گا، اسٹریٹ کرائم کو کنٹرول کیا جائے گا۔
مزید پڑھیں : ڈکیتی میں مزاحمت : گورنر سندھ نے پولیس چیف کے بیان کی حمایت کردی
وزیراعظم نے گورنر سندھ کو یقین دہانی کرائی کہ وفاقی حکومت اس ضمن میں جو تعاون کرسکی ضرور کرے گی،اسٹریٹ کرائم کے خاتمے، شہریوں کی جان ومال کی حفاظت اولین ترجیح ہے، پولیس کی کارکردگی بہتر بنانے کیلئے بھی اقدام کیے جائیں گے۔
