The news is by your side.

Advertisement

صحافی کے سوال پر کنگنا رناوت ایک بار پھرآپے سے باہر

بالی ووڈ ادکارہ کنگنا رناوت اپنے آنے والے ڈیجیٹل ریئلٹی شو کے تشہیری پروگرام کے دوران صحافی کی جانب سے پوچھے گئے سوال پر طیش میں آگئیں۔

بھارتی اداکارہ کنگنا رناوت اور تنازعات کا چولی دامن کا ساتھ ہے، اپنے متنازعہ بیانات اور بے لاگ تبصروں کے باعث وہ آئے دن متنازعہ خبروں کی زینت بنتی رہتی ہیں۔

حال ہی میں ایسا ہی ایک واقعہ ان کے آنے والے ڈیجیٹل ڈیٹنگ ریئلٹی شو لاکڈ اپ کی تشہیر کے دوران پیش آیا جب ایک نوجوان کے پوچھے گئے سوال پر وہ غصے سے بے قابو ہوگئیں اور صحافی کو کھری کھری سنادیں۔

تقریب کے دوران جب صحافی نے کنگنا سے دیپیکا پاڈوکون اور انسٹاگرام پر اثرانداز ہونے والے ایک صارف کے درمیان تازہ ترین جھگڑے پر تبصہ کرنے کو کہا جو ان کی فلم گہرائیاں کی تشہیرسے متعلق تھا تو اداکارہ نے اس صحافی کے سوال کا جواب دینے کے بجائے الٹا اس پر دوسری فلم کی تشہیر کرنے کا الزام عائد کردیا۔

کنگنا رناوت نے کہا سنو، میں یہاں ان کا دفاع کرنے آئی ہوں جو اپنا دفاع خود نہیں کرسکتے، سمجھ گئے نا۔ جن کی آپ بات کررہے ہو وہ اپنا دفاع خود کرسکتی ہیں ان کے پاس مواقع اور پلیٹ فارم دونوں دستیاب ہیں اور میں ان کی فلم کو یہاں پروموٹ نہیں کرسکتی اب تم بیٹھ سکتے ہو۔

کنگنا نے مزید کہا کہ آپ جانتے ہیں کہ یہ پرانی چال ہے، پچھلی بار اسی پریس کانفرنس میں میڈیا کی طرف سے مجھ پر پابندی لگائی گئی تھی، اس سے کچھ حاصل نہیں ہوا۔

اس سے پہلے کہ معاملہ مزید گرم ہوتا ریئلٹی شو کی پروڈیوسر ایکتا کپور درمیان میں آگئیں اور معاملے کو ٹھنڈا کرنے کی کوشش کی، وہ صحافی کے پاس گئیں اور اس سے گلے مل کر معاملے کو رفع دفع کیا۔

Comments

یہ بھی پڑھیں