بچے کی پیدائش کے فوری بعد ماں کا دودھ بچے کی صحت مند زندگی کے لیے پہلی اور بھرپور غذا تو ہے ہی، بالکل اسی طرح ماں کی جلد کا لمس بھی بچے کیلئے نہایت ضروری ہے، جسے ’کینگرو پیرنٹنگ‘ کہا جاتا ہے۔
جیسا کہ آپ کے علم میں ہے کہ کینگرو ایک ایسا جانور ہے جس کی مادہ اپنے بچے کی حفاظت اور صحت کیلیے اسے اپنی تھیلی نما گود میں رکھتی ہے جس کے بے شمار طبی فوائد ہیں۔
اس طریقہ علاج میں ماں نومولود بچے کو اپنے جسم کے ساتھ لگا کر اور اسے کمبل میں لپیٹ کر رکھتی ہے، یہ ایسے بچوں کی صحت و زندگی کو تحفظ دینے کا آزمایا ہوا آسان ترین طریقہ ہے۔
اے آر وائی نیوز کے پروگرام باخبر سویرا میں لائف کوچ ارم بنت صفیہ نے بچے کی صحت اور زندگی میں ماں کی جلد کے لمس ’کینگرو پیرنٹنگ‘ کی اہمیت بیان کی اور اس کے فوائد سے آگاہ کیا۔
انہوں نے کینگرو مدر کئیر کے حوالے سے بتایا کہ نومولود بچے کی پیدائش کے فوری بعد اسے خاص درجہ حرارت کی ضرورت ہوتی ہے جس کے لئے بچے کو کینگرو مدر کئیر دی جاتی ہے۔
انہوں نے بتایا کہ ’کینگرو پیرنٹنگ‘ کا آغاز 1970میں کولمبیا سے ہوا جس کی وجہ یہ تھی کہ وہاں بچوں کی شرح پیدائش بہت کم تھی کیونکہ پیدائش کے فوری بعد زیادہ تر بچے زندہ نہیں رہتے تھے۔
انہوں نے بتایا کہ کراچی میں ایک معروف نجی اسپتال نے حال ہی میں کینگرو پیرنٹنگ‘ کے طریقہ علاج پر عمل کرنا شروع کیا ہے جس کے مثبت نتائج سامنے آرہے ہیں، اس کے علاوہ دیہی علاقوں میں بھی اس حوالے سے آگاہی پروگرام منعقد کیے جارہے ہیں۔
ارم بنت صفیہ نے بتایا کہ نومولود بچے کیلیے ماں کی جلد کا لمس اس لیے بھی ضروری ہے کہ پیدائش کے فوری بعد مناسب درجہ حرارت پورا نہ ہونے کی صورت میں بچے کی زندگی کو خطرات لاحق ہوسکتے ہیں۔
نومولود بچے کو پیدائش کے فوری بعد ماں کے پیٹ پر لٹائیں اور بچے کا منہ چھاتی کے ساتھ لگا کر اوپر کپڑا ڈال دیں، بچے کو اس وقت تک لگائے رکھیں جب تک خاص درجہ حرارت مل نہ جائے۔ ان کا کہنا تھا کہ یہ کورس ابتدائی طور تین ماہ کیلیے کرایا جاتا ہے۔
