ڈبلیو ڈبلیو ای کے سابق ریسلر نے کہا ہے کہ بھارتی کامڈین کپل شرما نے اپنے شو میں جس طرح میرا مذاق اڑایا اس سے مجھے کافی تکلیف ہوئی۔
بھارت سے تعلق رکھنے والے ڈبلیو ڈبلیو ای کے سابق ریسلر سورو گورجر نے ایک بار پھر دی کپل شرما شو میں کامیڈین کپل شرما کے مذاق پر اپنی مایوسی اور دکھ کا اظہار کیا ہے۔ تنازعہ اس وقت شروع ہوا تھا جب کپل نے رنبیر کپور کے ساتھ ان کی تصویر ہر سورو کا مذاق اڑایا تھا۔
ایک پوڈ کاسٹ میں سورو نے الزام لگایا کہ کپل نے یہاں جو لطیفے استعمال کیے وہ گمراہ کن تھے، کامیڈی شو میں ریسلر کا مذاق اڑانے کے لیے مداحوں کے من گھڑت کمنٹس استعمال کیے گئے۔
شو میں ایک سیگمنٹ ہوتا ہے پوسٹ کا پوسٹ مارٹم کے نام سے جس میں کپل شرما مشہور شخصیات کے آفیشل سوشل میڈیا اکاؤنٹس پر کیے جانے والے مداحوں کے تبصرے پڑھتے ہیں۔
ایک قسط میں کپل شرما نے رنبیر کے ساتھ سورو کی ایک تصویر لی اور ایک کمنٹ پڑھا جس میں لکھا تھا ’’ایسا لگتا ہے کہ رنبیر نے نئی کار خریدی ہے، بی ایم ببلو۔‘‘
سورو نے کہا کہ ہم سب سمجھتے ہیں کہ کپل نے تصویر میں جو کمنٹس پڑھے ہیں وہ سچے اور حقیقی ہیں لیکن ایسا نہیں ہے۔
بھارت پہلوان نے بتایا کہ میری اور رنبیر کی جو تصویر تھی اس میں بی ایم ببلو کا کمنٹ دکھایا گیا اور میری شخصیت کا مذاق اڑایا گیا، جب مجھے اس کے بارے میں معلوم ہوا تو مجھے یہ پسند نہیں آیا۔
سورو گورجر نے کہا کہ بعد میں یہ کمنٹ دیکھنے کے لیے میں نے تصویر دیکھی تاہم وہ کمنٹ مجھے نہیں مل سکا، بعد میں کپل کی ٹیم نے وہ کمنٹ تصویر پر لکھنا شروع کر دیے، لیکن کوئی بھی وقت اور تاریخ دیکھ سکتا ہے کہ انھوں نے ایسا کب کیا تھا۔
