کراچی : اتحاد ٹاؤن میں بچوں کو تیز موٹرسائیکل چلانے سے منع کرنے پر دو سگے بھائیوں کو فائرنگ کرکے قتل کردیا گیا۔
تفصیلات کے مطابق کراچی میں بچوں کو تیز موٹرسائیکل چلانے سے منع کرنا جرم بن گیا، اتحاد ٹاؤن میں معمولی جھگڑے پر دو سگے بھائیوں کو فائرنگ کرکے قتل کردیا گیا۔
پولیس نے بتایا فائرنگ کا واقعہ جھگڑے کے دوران پیش آیا، جاں بحق دونوں افراد کی شناخت فاروق اور حسین کے نام سے ہوئی۔
اہلخانہ کا کہنا تھا جھگڑا بچوں کو تیز رفتاری سے موٹرسائیکل چلانے سے منع کرنے پر پیش آیا، مقتولین پارٹنر شپ پر پاپڑ کا کارخانہ چلاتے تھے۔
اہلخانہ نے بتایا کہ دونوں بھائی اپنے کارخانے سے گھر جارہے تھے کہ جھگڑے کے دوران بچوں نے فون کیا، جس کے کچھ دیر بعد گولیاں چلیں
پولیس کا کہنا ہے کہ مقتولین کا پوسٹ مارٹم مکمل کرلیا گیا اور فائرنگ میں ملوث افراد کی شناخت کر لی گئی ہے، جن کی گرفتاری کی کوششیں کر رہے ہیں۔
ورثا نے لاشیں پولیس چوکی کے باہر رکھ کر احتجاج کیا اور ملزمان کی فوری گرفتاری کا مطالبہ کردیا۔
