کراچی : پاکستان کے 76ویں جشن آزادی کے موقع پر رات گئے کراچی میں ہونے والی ہوائی فائرنگ سے ایک خاتون سمیت 2 افراد جاں بحق اور 60 سے زائد افراد زخمی ہوگئے۔
رات 12 بجتے ہی شہر کے مختلف علاقوں میں ہوائی فائرنگ کاسلسلہ شروع ہوا پورا شہر گونج اٹھا جو وقفے وقفے سے جاری رہا۔ اتوار اور پیر کی درمیانی شب گھروں سے نکلنے والے شہریوں کی بڑی تعداد کے باعث مختلف علاقوں میں ٹریفک جام ہوگیا۔
پولیس کا بتانا ہے کہ کراچی میں جشن آزادی کے موقع پر ہوائی فائرنگ کے مختلف واقعات میں ایک خاتون سمیت 2 افراد جاں بحق ہوگئے، نمائش چورنگی میں نامعلوم سمت سےگولی لگنے سے بسمہ نامی خاتون جاں بحق ہوئی۔
پولیس کا بتانا ہے کہ لیاری میں نامعلوم سمت سے گولی لگنے سے عبدالوہاب نامی شخص جاں بحق ہوا، مختلف علاقوں میں ہوائی فائرنگ کی زد میں آکر خواتین، بچوں سمیت 60 سے زائد افراد زخمی ہوئے ہیں۔
پولیس حکام کا بتانا ہے کہ ہوائی فائرنگ سے متاثرہ 29 زخمی جناح اسپتال لائے گئے، ہوائی فائرنگ کے واقعات میں اندھی گولیوں سے زخمی 24 زخمی سول اسپتال لائےگئے اس کے علاوہ عباسی شہید اسپتال میں ہوائی فائرنگ کے 9 زخمی لائے گئے۔
