کراچی کے علاقے خیابان اتحاد میں گاڑی اور موٹر سائیکل میں ٹکر کی فوٹیج سامنے آگئی۔
کراچی کے علاقے خیابان اتحاد میں تیز رفتاری کے باعث موٹر سائیکل گاڑی سے ٹکرائی اور جھگڑا شروع ہوگیا اور ملزم سلمان فاروقی نے سدھیر کو مارنا شروع کردیا۔
پولیس کا کہنا ہے کہ سدھیر سے متعلق تفصیلات اکٹھی نہیں کی جاسکیں۔
پولیس حکام کا کہنا ہے کہ سدھیر کے پاس لائسنس ہے یا نہیں اس کا علم نہیں، سدھیر ڈی آئی جی آفس سے گھر واپس چلا گیا تھا۔
واضح رہے کہ ڈیفنس اتحاد کمرشل میں نوجوان کو تشدد کا نشانہ بنانے کے مقدمہ کی سٹی کورٹ میں سماعت ہوئی تھی۔
یہ پڑھیں: کراچی : نوجوان پر تشدد کرنیوالے ملزم سلمان فاروقی کا 2 روزہ جسمانی ریمانڈ منظور
ملزم سلمان فاروقی کے وکیل نعیم قریشی بھی عدالت میں پیش ہوئے، سلمان فاروقی کی جانب سے ضمانت کی درخواست دائر کی۔
عدالت کو بتایا تھا کہ ملزم کے خلاف دھمکیاں دینے کا مقدمہ قابل ضمانت ہے تو تفتیشی افسر نے کہا استدعا کی ملزمان کا جسمانی ریمانڈ دیا جائے۔
جس پر وکیل صفائی نے کہا ملزم کا ایک دن کیلئے جسمانی ریمانڈ دے دیں، عدالت نے دو دن کے جسمانی ریمانڈ پر ملزموں کو پولیس کے حوالے کردیا۔
عدالت نے آئندہ سماعت پر پیش رفت رپورٹ پیش کرنے کا حکم دیتے ہوئے سماعت ملتوی کردی۔
