واشگٹن: اتوار کے روز کراچی کے جناح انٹرنیشنل ایئرپورٹ کے قریب ہونے والے خودکش بم دھماکے پر امریکی محکمہ خارجہ کی طرف سے اہم بیان آگیا۔
ترجمان امریکی محکمہ خارجہ میتھیو ملر نے پریس کانفرنس کے دوران خودکش بم دھماکے کی مذمت کرتے ہوئے کہا کہ دہشتگرد حملے میں جانوں کے ضیاع اور شہریوں کے زخمی ہونے پر دکھ ہوا، دہشتگردی سے متاثر ہونے والوں سے تعزیت کا اظہار کرتے ہیں۔
میتھیو ملر نے پاکستان میں پُرتشدد مظاہروں پر سوال کا جواب دیتے ہوئے کہا کہ دنیا بھر کی طرح پاکستان میں پُرامن اجتماع اور اظہار کی آزادی کی حمایت کرتے ہیں، پاکستان میں مظاہرین سے مطالبہ کرتے ہیں پُرامن رہیں اور تشدد سے گریز کریں۔
انہوں نے کہا کہ پاکستانی حکومت سے انسانی حقوق اور بنیادی آزادیوں کا احترام کرنے کا مطالبہ کرتے ہیں، پاکستان کے قانون اور آئین کے احترام کو یقینی بنانا اہم ہے، پاکستانی حکومت امن و امان برقرار رکھنے کیلیے اقدامات کرے۔
پریس کانفرنس کے دوران میتھیو ملر سے سوال کیا گیا کہ امریکی کمیشن نے محکمہ خارجہ سے بھارت پر پابندیاں عائد کرنے کا مطالبہ کیا ہے، کمیشن نے بھارت کو تشویشناک ممالک میں شامل کرنے کا مطالبہ کیا ہے، کیا محکمہ خارجہ کمیشن کی سفارشات پر عمل در آمد کرے گا؟
اس پر انہوں نے جواب دیا کہ ہم نے بھارت کے حوالے سے رپورٹ دیکھی ہے، کمیشن ایگزیکٹو برانچ کے ساتھ ساتھ کانگریس کو پالیسی سفارشات فراہم کرتا ہے، جائزہ لینے کے بعد وزیر خارجہ نے بھارت کو خاص تشویشناک ممالک میں شامل نہیں کیا، ہم بھارت سمیت ہر ملک میں مذہبی آزادی کی صورتحال پر بغور نگرانی کرتے رہتے ہیں۔
