کراچی ایئر پورٹ پر مسافروں کو چھوڑنے اور لینے کیلئے آنے والوں اور بیرون ملک سے آنے والے مسافروں کی جیبیں کب اور کیسے کٹ جاتی ہیں انتطامیہ کو اس کا علم ہی نہیں ہوتا۔
تفصیلات کے مطابق کراچی ایئرپورٹ پر رش ہونے کی وجہ سے مہمانوں کو لینے کیلئے آنے والے شہریوں اور بیرون ملک سے آنے والے مسافروں کی جیب کٹنے کے واقعات کثرت سے ہونے لگے ہیں۔
سول ایوی ایشن اتھارٹی کی بے بسی کا اندازہ اس بات سے بخوبی لگایا جاسکتا ہے کہ کراچی ایئرپورٹ پر آگاہی بینرز آویزاں کردیئے گئے جسے پڑھ کر شہریوں میں مایوسی اور غصے کیفیت پیدا ہوگئی۔
کراچی ایئرپورٹ کے انٹرنیشنل آروائیول پر آویزاں بینرز پر سول ایوی ایشن اتھارٹی کو سوشل میڈیا پر شدید تنقید کا سامنا کرنا پڑرہا ہے۔
سی اے اے کی جانب سے لگائے گئے بینروں میں مسافروں کو خبردار رہنے کی ہدایت کی گئی ہے اور کہا گیا ہے کہ مسافر اپنے سامان کی خود حفاظت کریں، ایئرپورٹ پر جیب کتروں سے ہوشیار رہیں۔
اس حوالے سے ترجمان سول ایوی ایشن نے کہا ہے کہ حجاج کرام کی واپسی پر ایئرپورٹ پر غیر معمولی رش ہوتا ہے اس لئے بینرز آویزاں کیے گئے ہیں۔
ترجمان سی اے اے کے مطابق رش کے باعث مسافروں کو جیب کتروں سے محفوظ اور محتاط رہنے کیلئے آگاہی کے طور پر بینرز آویزاں کئے گئے تاکہ لوگ کسی قسم کے نقصان سے محفوظ رہ سکیں۔
