کراچی میں سچل غازی گوٹھ کے قریب پیٹرول پمپ پر فائرنگ سے ایک شخص جاں بحق ہوگیا۔
تفصیلات کے مطابق کراچی کے علاقے سچل گوٹھ میں پیٹرول پمپ پر فائرنگ سے بائیک رائیڈر جاں بحق ہوگیا، پیٹرول ڈلوانے کے دوران موٹر سائیکل سوار افراد کی پمپ ملازم سے تکرار ہوئی، فائرنگ کی زد میں آکر بائیک رائیڈر جان سے گیا۔
پمپ ملازم کے مطابق دو افراد پمپ پر اپنی موٹر سائیکل میں پیٹرول ڈلوانے آئے تھے، ملزمان پیٹرول پمپ پر رکھی چیزوں سے چھیڑ چھاڑ کر رہے تھے، دونوں افراد کو کئی بار منع کیا لیکن نہ مانے۔
پمپ ملازم نے کہا کہ اس دوران دونوں ملزمان نے مجھ سے جھگڑا شروع کردیا، پمپ پر موجود افراد اور سیکیورٹی گارڈ نے جھگڑا ختم کر ایا، ملزمان نے پمپ سے تھوڑے فاصلے پر جاکر فائرنگ کردی جس سے موقع پر موجود ذیشان کمر پر گولی لگنے سے جاں بحق ہوگیا۔
پولیس کے مطابق مقتول ذیشان رائیڈر اور سچل گوٹھ کا رہائشی تھا، فائرنگ کرنے والے ملزمان کی تلاش شروع کردی ہے۔
مقتول کے ورثا کے مطابق ذیشان چاربچوں کا باپ تھا، تین سال سے آن لائن رائڈر کا کام کر رہا تھا، اعلیٰ حکام سے مطالبہ ہے ملوث ملزمان کو جلد گرفتار کیا جائے۔
