کراچی کے علاقے ملیر میں جناح انٹرنیشنل ایئرپورٹ سنگل کےقریب زوردار دھماکے میں متعدد افراد زخمی ہوگئے.
اطلاعات کے مطابق ایئرپورٹ سے ماڈل کالونی جانے والے سگنل کے قریب آئل ٹینکر میں زوردار دھماکا ہوا ہے اور جائے وقوعہ پر آگ بھڑک اٹھی.
فوری طور پر پولیس نے دھماکے کی نوعیت سے متعلق نہیں بتایا تاہم عینی شاہدین نے نمائندہ اے آر وائی نیوز کو بتایا کہ ایئرپورٹ سگنل پر آئل ٹینکر میں دھماکا ہوا ہے۔
دھماکا اس قدر شدید تھا کہ کورنگی، گلستان جوہر، گلشن حدید، ڈیفنس، جمشید روڈ اور گلشن اقبال سمیت دور دور تک آواز سنی گئی ہے۔ دھماکے میں متعدد افراد کے زخمی ہونے کی اطلاعات بھی موصول ہو رہی ہیں۔
اطلاع ملنے پر رینجرز، پولیس اور سیکورٹی اداروں کے اہلکار پہنچ چکے ہیں جب کہ ریسکیو ٹیمیں بھی موقع پر پہنچ کر امدادی کارروائیاں جاری رکھے ہوئے ہیں۔
ریسکیو حکام کا کہنا ہے کہ دھماکے میں زخمی ہونے والے 6 افراد کو اسپتال منتقل کر دیا گیا ہے۔
وزیر داخلہ سندھ ضیاالحسن لنجار نے ایس ایس پی ملیر سے رابطہ کر کے حقائق سے فی الفور آگاہ کرنے کی ہدایت کی گئی ہے۔ ایس ایس پی ملیر کا کہنا ہے کہ علاقہ پولیس اور افسران جائے وقوعہ پر موجود ہیں اور واقعے سے متعلق تمام حقائق جلد عوام کے سامنے لائے جائیں گے۔
