کراچی: شارع فیصل پر گیسٹ ہاؤس سے خاتون کی لاش ملنے کا مقدمہ مقتولہ کے والد نے درج کرادیا ، جس میں کہا بیٹی کو سابق شوہر عادل نے قتل کیا ،کارروائی کی جائے۔
تفصیلات کے مطابق کراچی کے علاقے شارع فیصل پر گیسٹ ہاؤس سے خاتون کی لاش ملنے کا مقدمہ درج کرلیا گیا۔
مقتولہ کے والد کی مدعیت میں ٹیپوسلطان تھانے میں مقدمہ درج کیا گیا، جس میں سابق شوہر کو نامزد کیا گیا ہے۔
مدعی مقدمے نے بتایا کہ پونے 11 بجے بھتیجی نےاطلاع دی کہ بیٹی کو سابق شوہرنےقتل کردیا ہے ، بھائی کے ہمراہ گیسٹ ہاوٴس پہنچا تو بیٹی کی لاش واش روم میں پڑی تھی۔
والد کا کہنا تھا کہ کل شام میری بیٹی اپنی بیٹی اور رشتے دار کےساتھ مزدوری کیلئےنرسری پر تھی ، سابق شوہر محمدعادل نے بیٹی ارم کو کہا ضروری بات کرنی ہے۔
مقدمے کے متن میں کہا گیا کہ بیٹی کا سابق شوہرگیسٹ ہاؤس کی دوسری منزل لے کر گیا، تیز دھار آلے سے قتل کردیا، بیٹی کو سابق شوہر عادل نے قتل کیا ،کارروائی کی جائے۔
پولیس کا کہنا ہے کہ ملزم فرار ہے تاہم گرفتاری کیلئے کارروائی کر رہے ہیں۔
یاد رہے گذشتہ روز کراچی کے علاقے ٹیپوسلطان میں ہوٹل کے کمرے سے خاتون کی گلہ کٹی لاش برآمد ہوئی تھی۔
پولیس کا کہنا تھا کہ ارم نامی خاتون چنیسر گوٹھ کی رہائشی تھی، مقتولہ اپنے سابقہ شوہر کے ہمراہ ہوٹل آئی تھی، جسے مبینہ طور پر سابقہ شوہر نے ہی تیز دھار آلے سے قتل کیا۔
ملزم کی گرفتاری کے لئے برنس روڈ اور آئی آئی چندریگرروڈ پر چھاپے مارے گئے،لیکن کامیابی نہیں مل سکی تاہم پولیس نے ہوٹل میں لگے کیمروں کی فوٹیجز اور اسٹاف کے بیانات قلمبند کرلئے ہیں۔
