کراچی: آئی جی جیل خانہ جات نے سی ٹی ڈی کے خلاف آئی جی سندھ کو خط لکھ دیا جس کے بعد جیل حکام کے خلاف مقدمے کی تفتیش کرائم برانچ کے حوالے کردی گئی۔
تفصیلات کے مطابق سی ٹی ڈی اور جیل حکام کے درمیان تناؤ جاری ہے جس کے بعد آئی جی جیل خانہ جات نے آئی جی سندھ پولیس اے ڈی خواجہ کو خط لکھا ہے جس میں ان سے سی ٹی ڈی کے رویے کی شکایت کی گئی ہے۔
جیل حکام نے کہا ہے کہ سی ٹی ڈی نے حالیہ دنوں جیل حکام کے خلاف ایک اور مقدمہ درج کیا ہے، سی ٹی ڈی کو کسی بھی قیدی سے ملنے کے لیے پورا تعاون کیا ہے لیکن سی ٹی ڈی حکام کیس میں مسلسل غیر منصفانہ رویہ اختیار کیے ہوئے ہیں۔
خط میں مزید کہا گیا ہے کہ سی ٹی ڈی کی امتیازی کارروائیاں جیل کے عملے پر اثرانداز ہوں گی۔
اس خط کے بعد اے ڈی خواجہ نے سی ٹی ڈی (کاؤنٹر ٹیررازم ڈپارٹمنٹ) سے 2017-157 کے مقدمے کی تفتیش واپس لے کر کرائم برانچ کے حوالے کرنے کا حکم جاری کردیا ہے۔
خیال رہے کہ جیل سے دو ہائی پروفائل قیدیوں کے فرار کی تحقیقات سی ٹی ڈی کے پاس تھی جو اب ان سے لے لی گئی ہے۔