کراچی : نگراں وزیر تجارت و صنعت گوہر اعجاز کے کراچی چیمبر آف کامرس پہنچنے پر تاجروں نے ان سامنے شکایات کے انبار لگا دیئے۔
اس موقع پر ایک تقریب کا انعقاد کیا گیا جس میں گفتگو کرتے ہوئے کراچی چیمبر آف کامرس اینڈ انڈسٹریز کے صدر طارق یوسف نے کہا کہ معاشی پریشانیاں مزید بڑھتی جارہی ہیں۔
انہوں نے کہا کہ بجلی کی اس قیمت پر کیا ہم عالمی مارکیٹ میں مقابلہ کرسکتے ہیں، پیداواری لاگت اسی طرح بڑھتی جائے گی تو ہم کیسے کام کریں گے؟
طارق یوسف کا کہنا تھا کہ مہینے میں8دنوں کیلئے گیس بند کردی جاتی ہے، کیا یہ صورتحال موزوں ہے؟ ان حالات میں ہم کیسے برآمدات میں اضافہ کرسکتے ہیں؟
انہوں نے تجویز دیتے ہوئے کہا کہ کچھ ایسی پالیسیاں بنائی جائیں کہ جس سے ہم اپنی برآمدات میں اضافہ کرسکیں تاہم ایس آئی ایف سی کے تحت اقدامات خوش آئند ہیں۔
صدر کراچی چیمبر کا کہنا تھا کہ اس وقت شرح سود بھی بہت زیادہ ہے، سولر پینل کیلئے اقدامات کیے جائیں تاکہ توانائی کے مسائل حل ہوں، چین کے ساتھ ایف ٹی اے پر ری وزٹ کرنے کی ضرورت ہے۔
اس موقع پر صدر اپیریل فورم جاوید بلوانی نے کہا کہ 2ماہ میں ٹیکسٹائل کی برآمدات10 فیصد کم ہوگئی، ڈی ایل ٹی ایل کے پیسے پھنسےہوئے ہیں، گیس کی لوڈشیڈنگ سے کاروباری طبقے کو بہت نقصان ہورہا ہے۔
