کراچی : شہر قائد میں بہادر شہری نے ڈاکوؤں کو پکڑ لیا، لوگوں نے دونوں ملزمان کی درگت بنانے کے بعد پولیس کے حوالے کردیا۔
تفصیلات کے مطابق کراچی کے علاقے ضلع وسطی میں اسٹریٹ کرائمز اور ڈکیتی کی وارداتوں میں نمایاں اضافہ دیکھنے میں آرہا ہے، جس پر قابو پانے میں پولیس بھی ناکام نظر آرہی ہے۔
کراچی میں پولیس کی کارکردگی سے مایوس شہریوں نے اپنی مدد آپ کے تحت خود ہی ہمت کرتے ہوئے ڈاکوؤں کو پکڑنا شروع کردیا۔
ایف بی ایریا دستگیر میں موٹر سائیکل سوار دو ڈاکوؤں نے شہریوں سے لوٹ مار کی، رہزنی کی واردات کے بعد ملزمان موٹر سائیکل پر فرار ہو رہے تھے۔
اس موقع پر ایک شہری نے چلتی موٹر سائیکل سے ایک ڈاکو کو پکڑ کر نیچے گرایا جس سے موٹر سائیکل پر بیٹھا دوسرا ملزم بھی نیچے گر گیا۔
ڈاکو نے اپنے آپ کو چھڑانے کی بھی کوشش کی لیکن ناکام رہا، اس دوران راہگیر اور دیگر علاقہ مکین بھی جمع ہوکر شہری کی مدد کو پہنچ گئے۔
شہریوں نے ڈاکو سے پستول چھین کر دونوں کو تشددکا نشانہ بنا ڈالا، واقعے کی اطلاع ملتے ہی پولیس کی بھاری نفری موقع پر پہنچ گئی۔
مشتعل علاقہ مکینوں نے دونوں ملزمان کو شدید زدوکوب کرنے کے بعد پولیس کے حوالے کیا، پولیس واقعے کی مزید تحقیقات کررہی ہے۔
واقعے کی سی سی ٹی وی فوٹیج اے آر وائی نیوز نے حاصل کرلی، پولیس کے مطابق گرفتار ملزمان کی شناخت عامر اور ایاز کے ناموں سے ہوئی، دونوں ملزمان اس سے قبل بھی گرفتار ہوکر جیل کی ہوا کھاچکے ہیں۔
