کراچی : شہر قائد میں ڈاکوؤں نے کار میں بیٹھی خاتون کو لوٹ لیا، ملزمان واردات کے بعد باآسانی فرار ہونے میں کامیاب ہوگئے، سرجانی ٹاؤن میں پولیس مقابلے کے بعد دو زخمی ملزمان گرفتار کرلیے گئے۔
تفصیلات کے مطابق کراچی میں ڈاکو بے لگام ہوگئے، وارداتیں رکنے کا نام نہیں لے رہیں، پولیس مؤثر اقدامات کے بجائے اپنی رسمی کارروائیوں تک محدود ہے۔
کراچی کے علاقے فیروزآباد تھانے کی حدود میں خاتون سے ملزمان نے لوٹ مارکی واردات کی سی سی ٹی وی اے آر وائی نیوز کو حاصل ہوگئی۔
کارسوارخاتون کچھ دیر پہلے ہی مارکیٹ سے سامان لے کر نکلی اور کار کے پاس پہنچی، کار میں بیٹھتے ہی گھات لگائے دو ملزمان موٹرسائیکل پر پہنچ گئے۔
ایک ملزم نے دروازہ کھولا اور دوسرے نے خاتون سے پرس چھین لیا، ملزمان نے چند لمحوں میں واردات کی اور فرار ہوگئے، پولیس نے خاتون کی شکایت پر واقعے کی رپورٹ درج کرلی ہے تاہم ملزمان تاحال مفرور ہیں۔
ایک اور کارروائی میں سرجانی ٹاؤن میں مبینہ پولیس مقابلہ ہوا ہے جس میں پولیس کی فائرنگ سے 2ملزمان زخمی حالت میں گرفتار کرلیے گئے۔
پولیس کے مطابق گرفتار ملزمان سے اسلحہ برآمد کرلیا گیا ہے، مذکورہ ملزمان ایک خاتون کے ساتھ واردات کرکے فرار ہو رہے تھے کہ پولیس پہنچ گئی۔
