کراچی: ویسٹ پولیس نے اسکریپ ڈیلرز/کباڑیوں کے خلاف کریک ڈاؤن شروع کر دیا ہے، ابراہیم حیدری تھانے کی حدود میں کباڑ کے ایک گودام سے حیران کن طور پر ہیوی ڈیوٹی مشینیں بھی برآمد ہوئیں۔
تفصیلات کے مطابق کراچی کے ضلع ویسٹ پولیس کی جانب سے اسکریپ ڈیلرز/کباڑیوں کے خلاف مسلسل کریک ڈاؤن جاری ہے، پولیس نے گزشتہ 20 روز کے دوران 52 اسکریپ ڈیلرز/کباڑیوں کو گرفتار کر لیا ہے۔
ایس ایس پی ویسٹ حفیظ الرحمٰن بگٹی کے مطابق گرفتار ملزمان کے خلاف متعلقہ تھانہ جات میں 27 مقدمات درج کیے گئے ہیں، گرفتار ملزمان چوری شدہ سامان/گاڑیوں کے پارٹس کی خرید و فروخت کرتے تھے، اور ان کے قبضے سے بھاری تعداد میں موٹر سائیکلوں کے چیچس، مختلف پارٹس اور دیگر سامان برآمد کیا گیا ہے۔
ایس ایس پی ویسٹ نے کہا کہ ملزمان چوری شدہ سامان/موٹر سائیکلوں کے پارٹس کے ٹکڑے کر کے فروخت کرتے تھے، گزشتہ 20 روز کے دوران متعدد کباڑیوں کو وارننگ بھی دی گئی ہے کہ وہ ضابطے پر عمل درآمد کی پابندی کریں۔
ادھر کراچی کے علاقے ابراہیم حیدری تھانے کی حدود میں کباڑ کے گودام پر چھاپے کے دوران مشینیں اور چوری شدہ سامان برآمد ہوا ہے، چشمہ گوٹھ میں قائم گودام سے لوہے اور اسٹیل کے آئٹم، اسکریپ پریسنگ یونٹ سمیت دیگر سامان برآمد ہوا۔
ایس ایس پی ضلع ملیر کاشف آفتاب عباسی کے مطابق مذکورہ گودام سے ملنے والی مشینیں انتہائی ہیوی ڈیوٹی ہیں، یہ مشینیں چوری کے سامان کو خام لوہے میں بدلنے کے کام آتی ہیں، ملزم سے مزید تقتیش کی جا رہی ہے کہ لوہا اور سامان کہاں کہاں سے اس کے پاس کٹنگ کے لیے آتا تھا۔
پولیس ایس ایس پی کے مطابق مذکورہ ملزم سے بڑی وارداتوں کے انکشافات کی توقع ہے، جب کہ اس کے قبضے سے ملنے والے سامان کی مالیت لاکھوں میں ہے۔
