کراچی میں ڈمپر نے ایک اور شہری کی زندگی کا چراغ گل کردیا۔
اے آر وائی نیوز کے مطابق کراچی کے علاقے میمن گوٹھ میں ڈمپر کی ٹکر سے موٹر سائیکل سوار شہری جاں بحق ہوگیا۔
ریسکیو حکام کا کہنا ہے کہ شہری کی شناخت 45 سالہ سیف اللہ کے نام سے ہوئی ہے۔
واضح رہے کہ گیارہ فروری کو علی الصباح ہاکس بے روڈ مشرف کالونی میں شیراز بس اسٹاپ کے قریب ڈمپر نے موٹر سائیکل سوار کو کچل کر جان لے لی۔ ڈرائیور موقع سے فرار ہوگیا تاہم پولیس نے موقع پر پہنچ کر ڈمپر تحویل میں لے کر تھانے منتقل کر دیا تھا۔
ریسکیو حکام کا کہنا تھا کہ حادثے میں جاں بحق موٹر سائیکل سوار کی شناخت 30 سالہ صدیق ولد یعقوب کے نام سے ہوئی ہے اور لاش کو سول اسپتال منتقل کر دیا گیا ہے۔
واضح رہے کہ یکم جنوری سے اب تک سال رواں کے ابتدائی 40 ایام میں کراچی میں قاتلوں کی طرح دندناتے ڈمپروں، ٹینکروں، ٹرکوں اور بسوں نے 100 سے زائد شہریوں کو موت کے گھاٹ اتار دیا ہے جب کہ درجنوں زخمی اور کئی زندگی بھر کے لیے معذور ہوچکے ہیں۔
بدمست ٹینکروں کو قابو کرنے کے لیے حکومت کی جانب سے ہیوی ٹریفک کے دن کے اوقات میں شہر میں داخلے پر پابندی بھی عائد کی گئی لیکن حادثات نہ رک سکے ہیں۔
