کراچی میں زلزلے کے جھٹکے محسوس کیے گئے ہیں، زلزلے کا مرکز شہر سے 32 کلومیٹر دور جنوب کی طرف تھا۔
شہرقائد میں رات کے وقت زلزلے کے جھٹے محسوس کیے گئے، ریکٹر اسکیل پر اس کی شدت 3.2 ریکارڈ کی گئی، زلزلہ پیما مرکز نے بتایا کہ زلزلے کی گہرائی 42 کلومیٹر تھی، اس کا مرکز کراچی سے 32 کلومیٹر جنوب مغرب کی جانب ریکارڈ کیا گیا.
اس سے قبل بھی ملک کے مختلف شہروں میں زلزلے کے جھٹکے محسوس کئے گئے تھے، ان زلزلوں کا مرکز تاجکستان افغانستان بارڈر تھا۔
زلزلہ پیما مرکز کا کہنا تھا کہ خیبرپختونخوا کے مختلف علاقوں سمیت اسلام آباد میں بھی زلزلے کے جھٹکے محسوس کئے گئے ہیں، زلزلے کی شدت 4.4، گہرائی 145 کلومیٹر ریکارڈ کی گئی۔
زلزلے کے باعث لوگ کلمہ طیبہ کا ورد کرتے ہوئے گھروں سے باہر نکل آئے۔ پشاور، مردان، نوشہرہ اور گردونواح، سوات، ملاکنڈ، لوئر دیر، مانسہرہ اور ہزارہ ڈویژن کے دیگر علاقوں میں زلزلہ محسوس کیا گیا۔
واضح رہے کہ چند دنوں قبل بھی پاکستان کے معاشی حب کراچی میں زلزلے کے جھٹکے محسوس کئے گئے تھے۔
زلزلہ پیما مرکز کے مطابق صدر، اولڈسٹی، کلفٹن اور کورنگی سمیت مختلف علاقوں میں زلزلے کے جھٹکے محسوس کیے گئے تھے۔
زلزلے کی شدت 3.2 ریکارڈ کی گئی تھی جب کہ زلزلے کا مرکز کراچی سے 15 کلومیٹر شمال مشرق میں تھا۔ زلزلے کی گہرائی 22 کلومیٹر ریکارڈ کی گئی تھی۔
