کراچی : ٹرین ڈرائیورز کی حاضر دماغی سے کراچی سے لاہور جانے والی کراچی ایکسپریس بڑے حادثے سے بچ گئی ، ٹریک پر رکاوٹ حادثے کا سبب بن سکتی تھی۔
تفصیلات کے مطابق کراچی سے لاہور جانے والی کراچی ایکسپریس حادثے سے بال بال بچ گئی، ریلوےذرائع نے بتایا کہ دوڑ اور باندھی ریلوے اسٹیشن کے درمیان ٹریک پر موجود رکاوٹ حادثے کا سبب بن سکتی تھی تاہم ٹرین ڈرائیور نے حاضر دماغی سے بریک لگا کر ٹرین کوروک لیا۔
.
ریلوےذرائع کا کہنا تھا کہ لوہے سے بنی بڑی چادر نما رکاوٹ ٹرین کو روک کر الٹا سکتی تھی، جس کے باعث جانی نقصان کا خدشہ تھا۔
یاد رہے رواں سال جون میں پشاور سے کراچی جانے والے خیبر میل کی ایک بوگی گدو اسٹیشن کے قریب پٹری سے اتر گئی تھی ، تاہم مسافر ٹرین کی رفتار کم ہونے کے باعث کسی مسافر کو نقصان نہیں پہنچا تھا۔
واضح رہے کہ گھوٹکی کے قریب کراچی سے فیصل آباد جانے والی ملت ایکسپریس کی بوگیاں ڈی ریل ہوکر ڈاؤن ٹریک پر جا گری تھی جس کے فوری بعد ڈاؤن ٹریک پر آنے والی سرسید ایکسپریس ان بوگیوں سے جا ٹکرائی۔
دلخراش حادثے میں کسمن بچوں اور خواتین سمیت 62 افراد جاں بحق جبکہ سینکڑوں زخمی ہوئے تھے۔
