کراچی میں سندھ بلڈنگ کنٹرول اتھارٹی کے جعلی افسران سرگرم ہو گئے ہیں جو گھروں کو سیل کر کے شہریوں کو ڈرا اور پھر رشوت طلب کر رہے ہیں۔
اے آر وائی نیوز کے مطابق کراچی کے شہریوں پر اسٹریٹ کرائمز اور سڑکوں پر دوڑتے خونیں ہیوی ٹریفک کی ہولناکیاں ہی کم تھیں کہ ان پر ایک اور نئی افتاد آ پڑی ہے۔
شہر قائد میں سندھ بلڈنگ کنٹرول اتھارٹی کے جعلی افسران سرگرم ہو گئے ہیں۔
یہ جعلی افسران پہلے شہریوں کے گھروں اور عمارتوں کو سیل کرتے ہیں اور پھر ڈی سیل کرنے کے لیے بھاری رقوم کا مطالبہ کرتے ہیں۔
کراچی کے علاقے اورنگی ٹاؤن میں سرگرم سندھ بلڈنگ کنٹرول اتھارٹی کے تین جعلی افسران شہریوں کے رشوت مانگتے ہوئے رنگے ہاتھوں دھر لیے گئے۔
جعلی اہلکاروں نے پہلے کچھ گھروں کو سیل کیا اور پھر ڈی سیل کرنے کے لیے پیسوں کا مطالبہ کیا۔ متاثرین کو ڈیل کرنے کے لیے چائے کے ہوٹل پر بلایا۔
اہل علاقہ نے اس کی اطلاع متعلقہ حکام کو دی تو ٹاؤن انتظامیہ موقع پر پہنچ گئی اور رنگ میں بھنگ ڈالتے ہوئے تمام جعلی افسران کو پکڑ کر پولیس کے حوالے کر دیا۔ جس نے انہیں حراست میں لینے کے بعد تحقیقات شروع کر دی ہیں۔
ٹاؤن انتظامیہ کے مطابق پکڑے گئے اہلکار ایجنٹ ہیں، جو خود کو سندھ بلڈنگ اتھارٹی کے افسران ظاہر کر کے شہریوں سے پیسے بٹورا کرتے تھے۔
