کراچی: شہر قائد کے علاقے ناظم آباد میں بے احتیاطی و لاپرواہی کے باعث پوری فیملی کرونا وائرس میں مبتلا ہوگئی۔
اے آر وائی نیوز کی رپورٹ کے مطابق کراچی کے علاقے ناظم آباد ایک خاتون کی بے احتیاطی اور لاپرواہی کے سبب پوری فیملی کرونا وائرس میں مبتلا ہوگئی۔
ذرائع کے مطابق سعودی عرب سے شادی میں شرکت کے لیے کراچی پہنچنے والی خاتون میں کرونا وائرس کی پہلے تصدیق ہوئی، مریضہ نے شادی کے فنکشن میں شرکت کی تھی۔
خاتون میں کرونا کی تشخیص کے بعد اہل خانہ کے ٹیسٹ کیے گئے تو خاندان کے 9 افراد میں کرونا وائرس پایا گیا۔
ذرائع کا کہنا ہے کہ کرونا وائرس سے متاثرہ افراد کو گھر میں آئسولیٹ کردیا گیا ہے، ایک ایک کرکے شادی کی تقریب میں آنے والے افراد کا پتا لگایا جارہا ہے۔
مزید پڑھیں: کراچی میں کرونا وائرس سے پہلا مریض جاں بحق، ملک میں اموات 3 ہو گئیں
واضح رہے کہ گزشتہ روز کراچی میں کرونا وائرس سے ایک مریض انتقال کرگیا تھا، وزیر صحت نے 77 سال کے مریض کی کرونا وائرس سے موت کی تصدیق کی تھی جبکہ ملک میں کرونا وائرس سے اموات کی تعداد 3 ہوگئی ہے۔
یاد رہے کہ ترجمان سندھ حکومت مرتضیٰ وہاب کا کہنا تھا کہ کرونا وائرس کے پیش نظر سندھ حکومت نے ابھی مکمل لاک ڈاؤن کا فیصلہ نہیں کیا ہے۔
ان کا کہنا تھا کہ کراچی میں 72 افراد کا کرونا ٹیسٹ منفی آیا ہے، ان لوگوں نے سوشل ڈسٹنسنگ پر عمل کیا ہے، احتیاط اور خود کو محفوظ رکھنے کا فائدہ سامنے ہے آئیں ہم سب ذمہ دار شہری ہونے کا مظاہرہ کریں۔
