کراچی : لیاقت آباد الکرم اسکوائر پر چائے کے ہوٹل پر رات گئے فائرنگ سے 4 افراد کے زخمی ہونے کا واقعہ پیش آیا ہے، زخمی ہونے والے شخص کا تعلق سیاسی جماعت سے ہے۔

اے آر وائی نیوز کی رپورٹ کے مطابق ایس ایس پی سینٹرل ذیشان صدیقی نے بتایا ہے کہ شریف آباد تھانے کی حدود الکرم اسکوائر کے ایک ہوٹل پر علی بلڈر نامی شخص اپنے 3 دوستوں کے ساتھ بیٹھا ہوا تھا۔

اس موقع پر دو موٹر سائیکلوں پر سوار4 مسلح افراد آئے اور ان پر اندھا دھند فائرنگ کردی، فائرنگ سے علی بلڈر نامی شہری اور دیگر 3افراد شدید زخمی ہوگئے۔

زخمی ہونے والے علی بلڈر کا تعلق سیاسی جماعت سے بتایا جارہا ہے، فائرنگ سے زخمی 4 افراد میں سے دو کی حالت انتہائی تشویشناک بتائی جارہی ہے، زخمیوں کو پہلے عباسی شہید اسپتال اور بعد ازاں نجی اسپتال منتقل کردیا گیا۔

ایس ایس پی سینٹرل کے مطابق جائے وقوعہ سے نائن ایم ایم کے 5 خول ملے ہیں، معاملے کی تحقیقات کررہے ہیں کہ ٹارگٹ کیا گیا ہے یا کوئی دشمنی کا معاملہ ہے۔

انہوں نے بتایا کہ جائے وقوعہ سے مزید شواہد اکٹھے کیے جارہے ہیں، اس کے علاوہ سی سی ٹی وی فوٹیجز بھی حاصل کی جارہی ہیں۔